بیجنگ۔24نومبر (اے پی پی):چین کی وزارت خارجہ کی ترجمان ماو ننگ نے کہا ہے کہ چین ورلڈ کلائمیٹ ایکشن سمٹ میں شرکت کرے گا۔چینی میڈیا کی رپورٹس کے مطابق پریس کانفرنس میں متحدہ عرب امارات میں منعقد ہونے والی ورلڈ کلائمیٹ ایکشن سمٹ میں چین کی شرکت کے حوالے سے سوال کا جواب دیتے ہوئے انہوں نے کہا کہ متحدہ عرب امارات کے صدر نے چینی صدر شی جن پنگ کو سربراہ اجلاس میں شرکت کی دعوت دیتے ہوئے متعدد خطوط بھیجے ہیں۔
تر جمان نے کہا کہ موسمیاتی تبدیلیوں سے فعال طور پر نمٹنے اور چین اور عرب ممالک کے درمیان روایتی دوستی کو مستحکم کرنے کے لیے نائب وزیر اعظم ڈنگ شیئے شیانگ صدر شی جن پنگ کے خصوصی نمائندے کی حیثیت سے سربراہی اجلاس میں شرکت کریں گے۔ چین موسمیاتی تبدیلیوں کے کنونشن میکانزم کے نظام ، اصولوں اور مقاصد اور جنرل اسمبلی کے موضوع "یکجہتی، عمل اور نفاذ” کی پاسداری کرنے کے لیے کوشش کرے گا تاکہ ترقی پذیر ممالک کو درپیش مشکلات اور مسائل کو سنجیدگی سے حل کیا جا سکے اور پیرس معاہدے کے مکمل اور موثر نفاذ کو فروغ دیا جا سکے ۔ سربراہ اجلاس کے دوران” جی 77اور چین” کا سربراہی اجلاس بھی منعقد ہو گا ۔
Short Link: https://urdu.app.com.pk/urdu/?p=413876
