بھکر۔ 22 اپریل (اے پی پی):ڈپٹی کمشنر محمد اشرف کی زیر صدارت ڈی ایچ کیو ہسپتال میں ڈسٹرکٹ ہیلتھ کونسل کے اجلاس کا انعقاد کیا گیا۔ منگل کو منعقدہ اجلاس میں سی ای او ہیلتھ اینڈ پاپولیشن ڈیپارٹمنٹ ڈاکٹر مظہر عباس بلوچ، ہسپتال کے ایم ایس ڈاکٹر احسان اللہ خان اور دیگر ہیلتھ افسران بھی موجود تھے۔
اس موقع پر سی ای او ہیلتھ اینڈ پاپولیشن ڈیپارٹمنٹ ڈاکٹر مظہر عباس بلوچ نے ڈپٹی کمشنر محمد اشرف کو ضلع کے ہسپتالوں اور مراکز صحت پر فراہم کردہ ہیلتھ سروسز کے بارے میں بریفنگ دی۔ڈپٹی کمشنر محمد اشرف نے ضلع کے ہسپتالوں اور مراکز صحت پر ادویات کی طلب و رسد کے ریکارڈ کا بھی جائزہ لیا۔
بعد ازاں ڈپٹی کمشنر محمد اشرف نے سی ای او ہیلتھ کے ہمراہ ہسپتال کے مختلف شعبہ جات کا بھی دورہ کیا۔انہوں نے ڈاکٹرز اور پیرامیڈیکل سٹاف کی حاضری چیک کی اور متعلقہ ذمہ داران کو ہدایات جاری کیں کہ ہسپتال میں مریضوں کو معیاری علاج کی فراہمی کیساتھ ساتھ ان سے خوش اسلوبی سے پیش آیا جائے۔
ڈپٹی کمشنر محمد اشرف نےہسپتال میں قائم پولیو ڈیسک کا معائنہ کرتے ہوئے پولیو ٹیموں کی کارکردگی کا جائزہ لیا اور انہیں تاکید کی وہ اپنے فرائض منصبی کی انجام دہی قومی فریضہ سمجھتے ہوئے ادا کریں۔ ڈپٹی کمشنر نے سی ای او کو ہدایات جاری کیں کہ ضلع میں جاری پولیو راؤنڈ کے دوران ہیلتھ ٹیموں کی کڑی مانیٹرنگ جاری رکھی جائے اور ویکسی نیشن کے مقررہ اہداف کی سو فیصد تکمیل یقینی بنائی جائے ۔
Short Link: https://urdu.app.com.pk/urdu/?p=585960
