ڈیرہ غازی خان ۔ 23 مئی (اے پی پی):ڈیرہ غازی خان میں ضلعی انتظامیہ، پنجاب فوڈ اتھارٹی اور لائیو سٹاک ڈیپارٹمنٹ کی مشترکہ کارروائی میں فروخت کے لیے لایا جانے والا مردہ جانور کا 6 من گوشت قبضے میں لے لیا گیا۔ کارروائی کے دوران ایک ملزم کو گرفتار کر لیا گیا جبکہ دو ملزمان فرار ہونے میں کامیاب ہو گئے۔تفصیلات کے مطابق اسسٹنٹ کمشنر ہیڈکوارٹر نذر حسین کورائی نے اطلاع ملنے پر یارو روڈ پر چھاپہ مارا گیا جہاں سے مردہ جانور کا گوشت برآمد کیا گیا۔
برآمد شدہ گوشت کو ضلعی انتظامیہ کی نگرانی میں غازی گھاٹ پل کے مقام پر دریائے سندھ میں تلف کر دیا گیا۔اس حوالے سے نذر حسین کورائی نے بتایا کہ پولیس تھانہ صدر نے تین افراد کے خلاف مقدمہ درج کرکے قانونی کارروائی کا آغاز کر دیا ہے۔ انہوں نے کہا کہ شہریوں کو صاف، حلال اور معیاری گوشت کی فراہمی کو یقینی بنانے کے لیے انتظامیہ متحرک ہے۔اسسٹنٹ کمشنر نے کہا کہ جب تک صحت دشمن عناصر کی بیخ کنی نہیں ہو جاتی، ایسی کارروائیاں جاری رہیں گی،وزیر اعلیٰ پنجاب کے ویژن کے تحت شہریوں کو معیاری خوراک فراہم کرنا اولین ترجیح ہے۔
یہ کارروائیاں کمشنر اشفاق احمد چوہدری اور ڈپٹی کمشنر محمد عثمان خالد کی ہدایت پر عمل میں لائی جا رہی ہیں۔
Short Link: https://urdu.app.com.pk/urdu/?p=600866
