لاہور۔11ستمبر (اے پی پی):ڈی سی لاہور رافعہ حیدر نے یو سی 94 شیر شاہ کالونی اچھرہ کا دورہ کیا اور ڈینگی مہم کا جائزہ لیا ۔ اس موقع پر ڈی سی لاہور ڈینگی مرض میں مبتلا مریض کے گھر گئیں ،
اس کی عیادت کی اور مریض کی جلد صحت یابی کی دعا کی۔انہوں نے کہا کہ گزشتہ چوبیس گھنٹوں میں ڈینگی کے 17 مریض رپورٹ ہوئے،کینٹ میں سب سے زیادہ 12 مریض رپورٹ ہوئے،علامہ اقبال، داتا گنج بخش، راوی، شالیمار اور واہگہ ٹائون میں ایک ایک مریض رپورٹ ہوا۔
ڈی سی لاہور نے ہدایت کرتے ہوئے کہا کہ ڈینگی سرویلنس ٹیمیں واٹر کولرز اور پانی کے ممکنہ ذرائع کو لازمی چیک کریں، ایل ڈبلیو ایم سی ورکرز علاقے میں صفائی ستھرائی کے انتظامات کو بہتر بنائیں،انتطامی افسران، ڈی ڈی ایچ اوز ڈینگی ٹیموں کی فیلڈ میں سخت مانیٹرنگ کریں۔
رافعہ حیدر نے کہا کہ ڈینگی مہم میں لاپرواہی برتنے والوں کے خلاف سخت کارروائی عمل میں لائی جائے،شہری ڈینگی ٹیموں کے بروقت نہ پہنچنے پر اطلاع دیں یا سوشل میڈیا پر ٹیگ کریں۔
Short Link: https://urdu.app.com.pk/urdu/?p=389193
