اسلام آباد۔14فروری (اے پی پی):کابینہ کی اقتصادی رابطہ کمیٹی (ای سی سی)نے برکس ممالک کے ذریعہ قائم کردہ نیو ڈویلپمنٹ بینک میں پاکستان کی رکنیت اورپاکستان سٹیٹ آئل اورآذربائیجان کی سٹیٹ آئل کمپنی(سوکار)کے اشتراک سے سنگاپور میں بین الاقوامی جوائنٹ ٹریڈنگ کمپنی کے قیام کی منظوری دیدی ہے، اجلاس میں کئی وزارتوں اورڈویژنز کیلئے تکنیکی ضمنی گرانٹس کی منظوری بھی دی گئی۔کابینہ کی اقتصادی رابطہ کمیٹی (ای سی سی) کا اجلاس جمعہ کویہاں وفاقی وزیر خزانہ و محصولات سینیٹر محمد اورنگزیب کی زیرصدارت میں منعقد ہوا۔ اجلاس میں وزیر تجارت جام کمال خان، وزیر توانائی سردار اویس احمد خان لغاری، وزیر مملکت برائے خزانہ و محصولات علی پرویز ملک، وفاقی سیکرٹریز اور متعلقہ وزارتوں و ڈویژنوں کے سینئر افسران نے شرکت کی۔
اجلاس میں وزارت تجارت کی تجویز پاکستان سٹینڈرڈز اینڈ کوالٹی کنٹرول اتھارٹی کے حالیہ نوٹیفائی کردہ لازمی اشیاء کے پی سی ٹی/ایچ ایس کوڈز کو درآمدی پالیسی آرڈر2022 میں شامل کرنے کی تجویز کی منظوری دی گئی،اس فیصلے سے پی وی سی اور پولیمر سے بنی مصنوعات کو لازمی ریگولیٹری دائرہ کار میں لایا جائے گا تاکہ پاکستان کے معیار کی مکمل تعمیل کو یقینی بنایا جا سکے۔اجلاس میں برکس ممالک کے ذریعہ قائم کردہ نیو ڈویلپمنٹ بینک میں پاکستان کی رکنیت کی منظوری بھی دی گئی۔ کمیٹی نے این ڈی بی کے 5,882 کیپٹل حصص خریدنے کی توثیق کی جن کی مجموعی مالیت 582 ملین ڈالر ہے جبکہ 116 ملین امریکی ڈالر بطور ادا شدہ سرمایہ جمع کرائے جائیں گے۔اجلاس میں وزارت توانائی (پاور ڈویژن) کی تجویز پر ڈسکوز کے حصص صدر پاکستان کے نام منتقل کرنے مشروط منظوری دیدی گئی، اس منتقلی کے کوئی مالی اثرات نہیں ہوں گے۔
کمیٹی نے پاکستان سٹیٹ آئل اورآذربائیجان کیسٹیٹ آئل کمپنی(سوکار)کے اشتراک سے سنگاپور میں بین الاقوامی جوائنٹ ٹریڈنگ کمپنی کے قیام کی بھی منظوری دی۔ کمیٹی نے وزارت پٹرولیم کو ہدایت کی کہ وہ مخصوص سرمایہ کاری کی منظوری، بشمول ایکویٹی انجیکشن اور کمپنی کے آپریشنل ہونے کے وقت کے حوالے سے مکمل احتیاطی تدابیر اختیار کرے۔اجلاس میں وزارت خزانہ کی تجویزپر ختم شدہ پاکستان پبلک ورکس ڈیپارٹمنٹ کے 133 پی ایس ڈی پی اسکیموں کے لئے مختص کئے گئے 19.15 ارب روپے کی منظوریدیدی گئی، یہ فنڈز متعلقہ وزارتوں، ڈویژنوں اور صوبائی حکومتوں کو منتقل کئے جائیں گے۔
ای سی سی نیایس ڈی جیز اچیومنٹ پروگرام کے تحت ترقیاتی سکیموں پر عملدرآمد کیلئے وزارت ہاؤسنگ اینڈ ورکس کیلئے 5.36 ارب روپے کی منظوریدیدی، جس میں سندھ کے لئے 4.25 ارب روپے اور خیبر پختونخوا کے لئے 1.11 ارب روپے شامل ہیں۔اجلاس میں نادرا کے لئے 1.914 ارب روپے (6.836 ملین امریکی ڈالر) کے تکنیکی ضمنی گرانٹ کی منظوری دیدی گئی، ان فنڈز کے زریعہ فاٹا ٹی ڈی پی-ای آر پیمنصوبے کے تحت خیبر پختونخوا میں 43 سٹیزن فیسلیٹیشن مراکز کی ٹرانسفرمیشن کویقینی بنایا جائے گا،یہ فنڈز اقتصادی امورڈویژنز نے نے سرنڈر کر دیئے تھے اور یہ داخلہ ڈویژن کے تحت استعمال ہوں گے جس سے حکومت پر اضافی مالی بوجھ نہیں پڑے گا۔
اجلاس میں وزارت قومی صحت کے لئے 500 ملین روپے کی منظوری دی گئی، اس سے زندگی بچانے والی ادویات اور ویکسین کی خریداری کی جائیگی، ای سی سی نے وزارت صحت کومستقبل میں اس مد کے ادائیگی کے لیے ساختی حل تیار کرنے کی ہدایت کی۔اجلاس میں صدارتی سیکرٹریٹ (پبلک) کے لئے 84 ملین روپے کی منظوری دی گئی جس کا مقصد پرانے سرکاری ٹرانسپورٹ کی جگہ نئے دو ہینو کوسٹر منی بسوں اور تین ٹویوٹا ہائی ایس وینز کی خریداری ہے۔
اجلاس میں ڈیجیٹل اکانومی انہانسمنٹ پراجیکٹ پارٹ II کے لئے تکنیکی ضمنی گرانٹ کی منظوری دی گئی،اس گرانٹ سے سرمایہ کاری بورڈ کے تحت پاکستان بزنس پورٹل قائم کی جائے گی جس کا مقصد قواعد و ضوابط کو ہموار کرنا، غیر ضروری قوانین کا خاتمہ اور کاروباری اداروں کے لئے ایک جامع ڈیجیٹل پلیٹ فارم مہیا کرنا ہے۔
Short Link: https://urdu.app.com.pk/urdu/?p=560944
