فیصل آباد۔ 27 جنوری (اے پی پی):نظامت زرعی اطلاعات محکمہ زراعت نے کاشتکاروں کوخربوزے کی بہترین پیداواری صلاحیت کی حامل اقسام ٹی 96 اور راوی کی کاشت فروری میں شروع کرنے کی سفارش کی ہے۔
محکمہ زراعت کے ترجمان نے صوبہ کے تمام علاقوں میں کاشتکاروں کو خربوزے کی کاشت فروری کے پہلے ہفتہ سے شروع کرنے کی سفارش کی ہے اور کہا ہے کہ خربوزے کی اقسام ٹی 96 اور راوی کو 21سے 35ڈگری سنٹی گریڈ پر ماہ مارچ کے آخر تک کاشت کیا جا سکتا ہے لیکن خربوزے کی ایک خاصیت یہ بھی ہے کہ اسے ہر قسم کی زمین میں کاشت کیا جا سکتا ہے تاہم اگر زرخیر میرا اور پانی کے مناسب نکاس کے نظام پر مشتمل زمین ہو تو خربوزے کی کاشت نہائت ہی موزوں ثابت ہو سکتی ہے۔
انہوں نے کہا کہ خربوزے کی کاشت اور بہتر فصل کے حصول کیلئے ایک سے ڈیڑھ کلو گرام تک بیج کا استعمال ہی کافی ہوتا ہے۔انہوں نے بتا یا کہ زمین کی تیاری کیلئے ایک مرتبہ مٹی پلٹنے والا ہل چلانے، اس کے بعد3 دفعہ عام ہل پھیرنے اور ہر مرتبہ ڈھیلے توڑنے، زمین کو نرم کرنے و بھر بھر ی بنانے کیلئے سہاگہ بھی چلاناچاہیے کیونکہ اس کے بہتر نتائج حاصل ہو سکتے ہیں۔انہوں نے کہا کہ محکمہ زراعت کے مشورے سے متوازن کھادوں کا استعمال بھی مؤثر نتائج کا حامل ہو سکتا ہے۔
Short Link: https://urdu.app.com.pk/urdu/?p=551974
