فیصل آباد۔ 28 اگست (اے پی پی):ماہرین زراعت نے کپاس کے کاشتکاروں کو ہدایت کی کہ کپاس کی فصل پر سفید مکھی کے حملہ سے متاثرہ پودوں کو فوری طور پر جڑ سے اکھاڑ کر پولی تھین بیگ میں ڈالنے کے بعد زمین میں دبا دیا جائے تاکہ کپاس کے دیگر صحت مند پودے اس بیماری کی زد میں آنے سے محفوظ رہ سکیں۔
ریسرچ انفارمیشن یونٹ آری فیصل آبادکے ترجمان نے بتایا کہ امسال موسم گرما کی شدت اور حبس زیادہ ہونے کی وجہ سے اکادکا مقامات پر کپاس کی فصل پر سفید مکھی کامعمولی حملہ مشاہدے میں آرہا ہے جوبروقت تدارکی اقدامات نہ ہونے کی صورت میں فصل پر حملہ آور ہو کر وائرس پھیلاسکتا ہے۔
انہوں نے بتایا کہ محکمہ زراعت کاعملہ کپاس کی فصل کی پیسٹ سکاؤٹنگ کا عمل جاری رکھے ہوئے ہے اور متاثرہ پودوں کو تلف بھی کیا جارہا ہے۔ انہوں نے کہا کہ حکومتی ہدایات کی روشنی میں محکمہ زراعت روزانہ کی بنیاد پر پیسٹ سکاؤٹنگ رپورٹ اکٹھی کر کے اس کے مطابق حکمت عملی تیار کررہا ہے۔
انہوں نے محکمہ زراعت کے فیلڈ سٹاف پر بھی زور دیا کہ کپاس کے کیڑے مکوڑوں کو کنٹرول کرنے کیلئے کسانوں کی بروقت رہنمائی کو یقینی بنایا جائے۔
Short Link: https://urdu.app.com.pk/urdu/?p=383494
