اسلام آباد۔4فروری (اے پی پی):اسلامی تعاون تنظیم (او آئی سی) کی قائمہ کمیٹی برائے سائنسی و تکنیکی تعاون (کامسٹیک) اور بنگلہ دیش کے دارالحکومت ڈھاکہ کی ڈافوڈیل انٹرنیشنل یونیورسٹی نے سائنسی و تکنیکی شعبوں، اعلیٰ تعلیم میں تعاون بڑھانے اور کامسٹیک فیلوشپ پروگرام کے تحت فلسطینی طلبہ کی معاونت کے لیے ایک مفاہمتی یادداشت پر دستخط کیے ہیں۔
کامسٹیک کی جانب سے منگل کو جاری بیان کے مطابق یہ معاہدہ ڈھاکہ بنگلہ دیش میں ڈی آئی یو میں منعقدہ ایک تقریب کے دوران باضابطہ طور پر طے پایا جس میں کامسٹیک کے کوآرڈینیٹر جنرل پروفیسر ڈاکٹر ایم اقبال چوہدری اور ڈی آئی یو کے وائس چانسلر پروفیسر ایم لطف الرحمٰن سمیت ڈافوڈیل انٹرنیشنل یونیورسٹی کے سینئر فیکلٹی ممبران نے شرکت کی۔ اس اقدام کے تحت ڈی آئی یو 35 فلسطینی طلبہ کو داخلہ اور انہیں مکمل طور پر فنڈڈ تعلیمی مواقع فراہم کرے گی تاکہ وہ اپنی انڈرگریجویٹ اور پوسٹ گریجویٹ تعلیم جاری رکھ سکیں۔
Short Link: https://urdu.app.com.pk/urdu/?p=555843
