اسلام آباد۔3دسمبر (اے پی پی):حکومت قازقستان اور کامسٹیک کے زیر اہتمام مشترکہ طور پر منعقدہ بائیو سیفٹی اور بائیو سکیورٹی کے موضوع پر بین الاقوامی ورکشاپ شروع ہو گئی، ورکشاپ کا موضوع ” خلا کو پر کرنا محفوظ مستقبل کیلئے بائیو سیفٹی اور بائیو سکیورٹی کے نظام کو بڑھانا”تھا۔ کامسٹیک او آئی سی کی قائمہ کمیٹی برائے سائنسی اور تکنیکی تعاون ہے اور اس کی میزبانی پاکستان کرتا ہے۔
کامسٹیک سیکرٹریٹ میں منعقد ہونے والی ورکشاپ میں پاکستان سمیت مصر، جارجیا، اردن، قازقستان، ملائیشیا، نائیجیریا، یوگنڈا اور ازبکستان کے ماہرین نے شرکت کی جس کا مقصد حیاتیاتی سائنس میں ہونے والی ترقیوں اور قدرتی طور پر انسانی سلامتی کو درپیش چیلنجز ، عالمی سطح پر ہونے والے واقعات جیسا کہ COVID-19 وبائی مرض پر تبادلہ خیال کیا جا سکے۔کامسٹیک سیکرٹریٹ کی جانب سے یہاں جاری اعلامیہ کے مطابق ماہرین حیاتیاتی ہتھیاروں کے کنونشن (BWC) اور BTWC جیسے حیاتیاتی تحفظ کو یقینی بنانے کے لیے موجودہ پالیسی سازی، پروٹوکول اور مکمل نفاذ کے لیے ان کی حدود اور رکاوٹوں پر بھی غور کریں گے۔ ورکشاپ میں خاص طور پر قازقستان کے صدر کی طرف سے اقوام متحدہ میں 2020 میں بین الاقوامی ایجنسی برائے حیاتیاتی تحفظ (IABS) کے قیام کے لیے شروع کی گئی تجویز کا جائزہ لیا جائے گا اور موجودہ معاہدوں کے تحت اس کے عملی نفاذ کے لیے طریقے اور ذرائع بھی تجویز کیے جائیں گے۔
افتتاحی سیشن سے کامسٹیک کے کوآرڈینیٹر جنرل پروفیسر ڈاکٹر ایم اقبال چوہدری نے خطاب کیا۔ قازقستان کے سفیر مسٹر یرژان کِسٹافن،اوآئی سی جنرل سیکرٹریٹ کے نمائندے مسٹر ارمان ٹائنی بیک، ورکشاپ ٹیکنیکل کمیٹی کے چیئر مین پروفیسر ڈاکٹر ثابت خان شنواری اور ورکشاپ کے فوکل پرسن پروفیسر ڈاکٹر ایس خورشید حسنین نے بھی اپنے خیالات کا اظہار کیا۔ مقررین نے بائیو سیکیوریٹی اور بائیو سیفٹی کے ابھرتے ہوئے خطرات کے تناظر میں قازقستان کے اقدام کی فوری اور بروقت نوعیت پر روشنی ڈالی اور ورکشاپ کے پس منظر ،سائنس اور ٹیکنالوجی کے مختلف شعبوں میں کامسٹیک اور قازقستان کے درمیان جاری تعاون کے بارے میں تفصیلات سے آگاہ کیا۔ ورکشاپ میں ملکی ماہرین بائیو سیفٹی اور بائیو سیکیورٹی کو بڑھانے کے لیے درکار اقدامات اور اس ڈومین میں موجود مختلف معاہدوں اور کنونشنز کی جانچ کے بارے میں اپنے تجربات اور مشاہدات کا اشتراک کریں گے۔
Short Link: https://urdu.app.com.pk/urdu/?p=416150
