لاہور۔6مئی (اے پی پی):گذشتہ چوبیس گھنٹوں کے دوران پنجاب بھرمیں 1237ٹریفک حادثات میں 9افراد جاں بحق جبکہ 1439زخمی ہوئے، ایمرجنسی سروسزڈیپارٹمنٹ نے پنجاب بھر میں 1237ٹریفک حادثات پر ریسپانڈ کیا۔ ترجمان کے مطابق ٹریفک حادثات میں 9افراد جان کی بازی ہار گئے،چینو ٹ میں ٹریکٹر ٹرالی اور مو ٹر سائیکل کے تصادم سے 2خواتین جاں بحق، بہا ولپور میں ٹریکٹر ٹرالی نے بچے کو کچل دیا،سرگودھا میں گدھا ریڑھی اور مو ٹر سائیکل کے تصادم میں ایک شخص جاں بحق،چکوال میں دو ڈمپرز کے تصادم سے ایک شخص جاں بحق،رحیم یار خان،وہاڑی،چکوال،بہاولنگر،میانوالی میں ٹریفک حادثات کے نتیجے میں ایک، ایک شخص جاں بحق ہوا۔
پنجاب بھر میں ٹریفک حادثات میں 584افراد شدید زخمی ہوئے جنہیں فوری طور پر نزدیکی ضلعی و تحصیل کے ہسپتالوں میں منتقل کیا گیا۔855معمولی زخمی لوگوں کو ریسکیومیڈیکل ٹیموں کے جائے حادثہ پر بروقت طبی امداد فراہم کرنے کی وجہ سے ہسپتالوں پر بوجھ بھی کم ہوا۔ان حادثات میں زیادہ تر تعداد (74فیصد)موٹر سائیکلز حادثات کی ہے اس لیے وقت کی ضرورت ہے کہ روڈ ٹریفک حادثات کی بڑھتی ہوئی شرح کو کم کرنے کے لیے ٹریفک قوانین پر سختی سے عمل کرتے ہوئے لائن اور لین کے نظم و ضبط کا خیال رکھیں۔ اعدادو شمار سے ظاہر ہوتا ہے کہ229ٹریفک حادثات کی فون کالز لاہور کنٹر ول روم میں موصول ہوئیں
جس میں صوبائی درالحکومت279متاثرین کے ساتھ پہلے، فیصل آباد81حادثات میں 97متاثرین کے ساتھ دوسر ے جبکہ گو جرا نوالہ80حادثات میں 84متاثرین کے سا تھ تیسرے نمبرپررہا۔
Short Link: https://urdu.app.com.pk/urdu/?p=593554
