لاہور۔2اکتوبر (اے پی پی):گلو کار مسعوداحمد رانا کی برسی 4 اکتوبر بروز جمعہ منائی جائے گی ۔ مسعود احمد رانا 9جون 1938کو میرپور خاص کی زمیندار فیملی میں پیدا ہوئے، قیام پاکستان سے قبل ہی ہجرت کرکے سندھ میں رہائش اختیار کرگئے ۔ مسعود احمد رانا نے کسی سے موسیقی کی تعلیم حاصل نہیں کی،وہ محمد رفیع سے متاثر تھے۔ انہوں نے پچاس کی دہائی میں ریڈیو پاکستان حیدر آباد سے فنی سفر کا آغاز کیا، بطور پلے بیک سنگر انہیں شہرت باباجی اے چشتی کی بنائی دھن پر فلم ڈاچی کے گیت ٹانگے والا خیر منگدا سے ملی۔
انہوں نے 5 ہزار سے زائد فلمی و غیر فلمی گیت گائے۔ مسعود احمد رانا نے تین عشروں تک پاکستان کی فلمی موسیقی پر حکمرانی کی۔وہ 1964میں لاہو رمنتقل ہوئے اور جلد ہی اردو اور پنجابی فلموں کے مقبول ترین گلوکار بن گئے۔انہوں نے اردو اور پنجابی زبانوں میں تین سو سے زائد گیت گائے جن کا آج بھی کوئی نعم البدل نہیں اور ساڑھے پانچ سو سے زائد فلموں کےلئے گانے ریکارڈ بھی کروائے۔مسعود احمد رانا 4 اکتوبر 1995کو خالق حقیقی سے جا ملے۔ان کی برسی کے موقع پر شو بز انڈسٹری اور موسیقی سے دلچسپی رکھنے والے طبقوں کے زیر اہتمام منعقدہ تقریبات میں انہیں خراج عقیدت پیش کیا جائے گا۔
Short Link: https://urdu.app.com.pk/urdu/?p=507536
