اسلام آباد۔16اپریل (اے پی پی):گورنر خیبر پختونخوا فیصل کریم کنڈی سے برطانیہ کے ہائوس آف لارڈز، سفارتکاروں اور ممتاز کاروباری شخصیات پر مشتمل ایک اعلیٰ سطحی وفد نے اسلام اباد میں ان کی رہائش پر ملاقات کی۔بدھ کو گورنر آفس کی جانب سے جاری بیان کے مطابق وفد میں لارڈ لنکاسٹر آف کمبولٹن، لارڈ عامر سرفراز آف کینسنگٹن، جناب وقار احمد ملک (ایمبیسیڈر ایٹ لارج)، وسیم الرحمن (سی ای او سیمسن گروپ)، آصف اللہ خان (آکسفورڈ الومینائی پاکستان)، بیرسٹر منصور شاہ، میاں یوسف جمال، مارٹن شلز اور سلمان لطیفی شامل تھے۔
ملاقات میں خیبر پختونخوا میں سیاحت کے فروغ خصوصاً اپر دیر، سوات اور چترال جیسے خوبصورت علاقوں کو عالمی سطح پر اجاگر کرنے کے امکانات پر تفصیلی گفتگو ہوئی۔ گورنر فیصل کریم کنڈی نے وفد کا شکریہ ادا کرتے ہوئے پاک۔برطانیہ تعلقات کو مضبوط بنانے میں ان کے کردار کو سراہا، بالخصوص سیاحت کے شعبے میں ان کی دلچسپی کو قابل تعریف قرار دیا۔گورنر نے کہا کہ خیبر پختونخوا نہ صرف قدرتی حسن سے مالا مال ہے بلکہ یہاں مذہبی سیاحت کے بے پناہ مواقع بھی موجود ہیں۔
انہوں نے تاریخی مقامات اور قدیم تہذیبوں کے آثار کو عالمی سیاحوں کے لیے پرکشش قرار دیا۔ ملاقات کے دوران سیاحتی انفراسٹرکچر کو بہتر بنانے اور سیاحوں کے لئے سہولیات میں اضافے جیسے امور پر بھی تبادلہ خیال ہوا۔ گورنر نے امید ظاہر کی کہ ایسے روابط نہ صرف عالمی سرمایہ کاری کو فروغ دیں گے بلکہ مقامی کمیونٹیز کو بھی فائدہ پہنچائیں گے۔ملاقات کے آخر میں پائیدار سیاحت کے فروغ اور خیبر پختونخوا کو دنیا کے ایک ممتاز سیاحتی مقام کے طور پر اجاگر کرنے کے عزم کا اعادہ کیاگیا۔
Short Link: https://urdu.app.com.pk/urdu/?p=582776
