گیارہویں مینز جونیئر ہاکی ورلڈکپ کا آغاز (کل) ہو گا، جرمنی کی ٹیم ٹائٹل کا دفاع کرے گی

ممبئی ۔ 7 دسمبر (اے پی پی) گیارہویں مینز جونیئر ہاکی ورلڈ کپ کا آغاز (کل) جمعرات سے بھارت میں ہو گا جس میں جرمنی کی ٹیم ٹائٹل کا دفاع کرے گی۔ پاکستانی جونیئر ٹیم کی جگہ ملائیشیا کی ٹیم ایکشن میں نظر آئے گی۔ نیوزی لینڈ اور جاپان کی ٹیمیں افتتاحی میچ میں آمنے سامنے ہوں گی۔ 18 دسمبر تک جاری رہنے والے ایونٹ میں 16 ٹیمیں عالمی ٹائٹل کے حصول کیلئے ایکشن میں دکھائی دیں گی جنہیں چار مختلف گروپس میں تقسیم کیا گیا ہے، گروپ اے میں آسٹریلیا، جنوبی کوریا، ارجنٹائن اور آسٹریا، گروپ بی میں ہالینڈ، ملائیشیا، بیلجیئم اور مصر، گروپ سی میں دفاعی چیمپئن جرمنی، نیوزی لینڈ، سپین اور جاپان جبکہ گروپ ڈی میں انگلینڈ، کینیڈا، جنوبی افریقہ اور میزبان بھارت شامل ہیں۔

Short Link: https://urdu.app.com.pk/urdu/?p=32518