ابوظہبی۔1جولائی (اے پی پی):متحدہ عرب امارات نے تنزانیہ سے بس کے المناک حادثے اور 38 افراد کی ہلاکت پر تنزانیہ کی حکومت سے اظہارِ تعزیت کیا ہے ۔امارات نیوزایجنسی وام کے مطابق متحدہ عرب امارات نے کلیمانجارو کے علاقے میں ہونے والے ایک بس حادثے میں ہلاک اور زخمی ہونے والوں کے لواحقین کے ساتھ دلی تعزیت اور ہمدردی کا اظہار کیا ہے۔
اماراتی وزارتِ خارجہ کی جانب سے ایک بیان میں کہا گیا کہ متحدہ عرب امارات، متحدہ جمہوریہ تنزانیہ کی حکومت اور عوام کے ساتھ یکجہتی کا اظہار کرتا ہے اور اس افسوسناک سانحے پر تعزیت کا اظہار کرتا ہے۔
وزارت نے متاثرہ خاندانوں سے ہمدردی کے ساتھ ساتھ تمام زخمیوں کی جلد صحتیابی کے لیے بھی نیک تمناؤں کا بھی اظہار کیا۔تنزانیہ میں دو رز قبل دو بسوں کے تصادم میں 38 افراد ہلاک اور 28 زخمی ہو گئے تھے ۔ تصادم کے باعث دونوں گاڑیوں میں آگ لگ گئی تھی ۔
