اسلام آباد۔16اپریل (اے پی پی):طوفانی بارش اور ژالہ باری کے بعد آئیسکو آپریشن اور کنسٹرکشن ٹیموں نے بیشتر علاقوں کی بجلی بحال کر دی۔ترجمان آئیسکو کے مطابق طوفانی بارش اور ژالہ باری کے باعث آئیسکو کا ڈسٹری بیوشن سسٹم متاثر ہوا اور متعدد مقامات پر بجلی کے کھمبوں کے گرنے اور تاروں کے ٹوٹنے کے واقعات رپورٹ ہوئے اور بیشتر 11 کے وی فیڈرز پر بوجہ سیفٹی فالٹ اور ٹرپنگ بجلی کی فراہمی میں تعطل پیش آیا۔
انہوں نے کہا کہ متاثرہ فیڈرز میں گولڑہ ،پی ایچ اے ،پیر مہر علی شاہ ،ایف ٹن مرکز ،نیشنل پولیس فائونڈیشن ،سروس روڈ ایسٹ ،کیرج فیکٹری، پتٹریاٹہ، اپر ٹوپہ ،پیر سوہاوہ، مدینہ کالونی ،ایئر پورٹ سوسائٹی سیکٹر فور نیو، ریس کورس ،ابوبکر شکریال، خیابان سر سید ،فیض آباد کمیٹی چوک ،جاپان روڈ ،چونترہ 502 ورکشاپ ،سکھو ،سنگجانی ، شاہ اللہ دتہ، مشین محلہ، چپ بورڈ، گوجر خان، ڈومیلی سی او ڈی کالا فیڈرز متاثر ہونے سے بجلی کی فراہمی میں تعطل پیش آیا۔ آئیسکو آپریشن اور کنسٹرکشن ٹیموں نے قلیل وقت میں بیشتر علاقوں کی بجلی بحال کر دی ہے۔
آئیسکو چیف محمد نعیم جان بجلی بحالی کی کارروائیوں کی براہ راست نگرانی کر رہے ہیں۔انہوں نے کہا کہ صارفین بارش کے دوران بجلی تنصیبات سے مناسب فاصلے کو یقینی بنائیں، انفرادی ٹرانسفارمرز اور دیگر شکایات کے ازالے کے لئے تمام فارمیشنز متحرک ہیں۔ کسی بھی شکایت کی صورت میں کمپلینٹ دفاتر کے نمبرز ہیلپ لائن 118 کمپلینٹ اینڈ مانیٹرنگ سیل کے نمبر 0519252933 پر رابطہ کریں۔ترجمان نے کہا کہ بجلی کی فراہمی میں عارضی تعطل پر آئیسکو انتظامیہ صارفین سے معذرت خواہ ہے۔
Short Link: https://urdu.app.com.pk/urdu/?p=583149
