اسلام آباد۔16اکتوبر (اے پی پی):اسلام آباد الیکٹرک سپلائی کمپنی (آئیسکو) کی اسلام آباد ، راولپنڈی ، اٹک، جہلم ، چکوال میں نادہندگان کے خلاف بجلی واجبات کی وصولی کے لئے بھرپور مہم جاری ہے، ایک ہی دن میں ریجن بھر میں 130 نادہندگان سے 14 لاکھ سے زائد کی ریکوری کی گئی جبکہ 131 ڈیڈ ڈیفالٹرز سے 19 لاکھ سے زائد کے واجبات وصول کیے گئے۔
ترجمان آئیسکوراجہ عاصم نذیر کے پیر کو جاری بیان کے مطابق بجلی نادہندگان سے واجبات کی وصولی کے لئے آئیسکو ریکوری ٹیمیں مکمل متحرک ہیں اور ستمبر سے جاری کریک ڈاؤن کے دوران 26399نادہندگان سے 41 کروڑ 46 لاکھ واجبات وصول کیے جا چکے ہیں ۔
انہوں نے کہا کہ بجلی واجبات ادا نہ کرنے والے صارفین کے میٹرز اور ٹرانسفارمرز اتار لئے گئے۔ترجمان نے کہا کہ آپریشن کے دوران ڈیٹیکشن اور ریکوری ٹیموں کو پولیس کا مکمل تعاون حاصل ہے، صارفین بجلی کی بلا تعطل فراہمی اور میڑز کٹنے کی زحمت سے بچیں اور بجلی کے بلوں کی بروقت ادائیگی کو یقینی بنائیں۔ ترجمان آئیسکو نے کہا کہ آپریشن کے دوران ڈیٹیکشن اور ریکوری ٹیموں کوحکومت پاکستان وزارت توانائی ، پولیس اور ضلعی انتظامیہ کا مکمل تعاون حاصل ہے۔
