اسلام آباد۔5مارچ (اے پی پی):اسلام آباد الیکٹرک سپلائی کمپنی(آئیسکو) نے ماہ ستمبر 2023 سے بجلی چوروں اور نادہندگان کے خلاف جاری کارروائیوں میں4803بجلی چوروں کو41کروڑ85لاکھ سے زائد جرمانہ اور 2لاکھ سے زائد نادہندگان سے6 ارب 21کروڑ کے واجبات کی ریکوری کی ہے۔
ترجمان آئیسکو کے مطابق ماہ رمضان المبارک میں معزز صارفین کو بجلی کی بلاتعطل فراہمی کے ساتھ مستحکم پاکستان کی راہ میں رکاوٹ بجلی چوروں اور نادہندگان کے خلاف بھی تسلسل سے کارروائیوں کا سلسلہ جاری ہے۔
انہوں نے کہا کہ بجلی چوروں کے خلا ف جاری کریک ڈائون کے دوران ستمبر2023سے تمام آپریشن سرکلز بشمول اسلام آباد، راولپنڈی سٹی، راولپنڈی کینٹ، جہلم ، اٹک اور چکوال میں پولیس اور دیگر لا انفورسمنٹ اداروں کے تعائون سے آئیسکو ڈیٹیکشن ٹیموں نے ستمبر کے دوران 4803بجلی چور پکڑے اور انہیں سلو میٹر، ٹمپرڈ میٹر اور بجلی کے ڈائریکٹ استعمال پر41کروڑ85لاکھ سے زائد کے جرمانے عائد کئے اور 2479بجلی چوروں کو پولیس نے گرفتار کیا جبکہ بجلی نادہندگان کے خلاف کارروائی کرتے ہوئے2لاکھ10ہزار سے زائد رننگ اور ڈیڈ ڈیفالٹرز سے آئیسکو ریکوری ٹیموں نے6 ارب 21کروڑ99لاکھ کے واجبات وصول کئے اور بل ادا نہ کرنے والے متعدد صارفین کے میٹرز اور ٹرانسفارمرز منقطع کر دیئے۔
آئیسکو چیف ایگزیکٹو محمد نعیم جان نے صارفین سے درخواست کی ہے کہ بجلی کے بل بروقت ادا کر کے اپنا قومی فریضہ ادا کریں اور بجلی چوروں کی اطلاع متعلقہ ایس ڈی اوآفس، ہیلپ لائن نمبر118پر دیں۔
Short Link: https://urdu.app.com.pk/urdu/?p=569151
