اسلام آباد۔8دسمبر (اے پی پی):وفاقی وزیر سائنس و ٹیکنالوجی چوہدری فواد حسین نے کہا ہے کہ آئینی طور پر کوئی امر مانع نہیں کہ اگر اپوزیشن استعفے دے تو ضمنی الیکشن کرا دیئے جائیں، حکومت کو سیاسی طور پر کوئی بڑا خطرہ نہیں ہے، حکومت اور اپوزیشن کو بات چیت کے ذریعے ہی مسائل کا حل تلاش کرنا چاہیے۔ ان خیالات کا اظہار انہوں نے منگل کو نجی ٹی وی چینل کے پروگرام میں گفتگو کرتے ہوئے کیا۔ انہوں نے کہا کہ اگر اپوزیشن رہنما استعفے دیتے ہیں تو خالی ہونے والی نشستوں پر الیکشن کرایا جائے گا۔ انہوں نے کہا کہ میرا خیال ہے کہ مسائل کے حل کے لئے حکومت اور اپوزیشن کو ایک ایک قدم پیچھے ہٹنا چاہیے، اگر اختلافی مسئلے سے بات شروع کریں گے تو مذاکرات کیسے ہو سکتے ہیں۔ انہوں نے کہا کہ اپوزیشن کے جلسوں اور استعفوں سے حکومت کو کوئی بڑا خطرہ نہیں ہے، حکومت اپوزیشن کے ساتھ بات چیت کے لئے سنجیدہ ہے۔ انہوں نے کہا کہ وزیراعظم عمران خان نے واضح کیا ہے کہ کرپشن کیسز کے علاوہ باقی معاملات پر بات چیت ہو سکتی ہے، این آر او نہیں دیا جائے گا اور اپوزیشن جماعتوں کے قائدین کے خلاف جاری احتساب کے عمل اور مقدمات پر کوئی سمجھوتہ نہیں کیا جائے گا۔ایک سوال کے جواب میں وفاقی وزیر نے کہا کہ کابینہ اجلاس میں پی ڈی ایم کے حوالے سے گفتگو نہیں ہوئی، کچھ معاملات پر بحث ہو رہی ہے، بات چیت کے حوالے سے جلد ہی کوئی فارمولہ پیش کیا جائے گا، امید ہے فارمولے کے بعد معاملات بہتر ہو جائیں گے۔ انہوں نے کہا کہ حکومت اور اپوزیشن کو بات چیت کے ذریعے ہی مسائل کا حل تلاش کرنا چاہیے۔
