اسلام آباد۔25دسمبر (اے پی پی):سپیکر قومی اسمبلی راجہ پرویز اشرف اور ڈپٹی سپیکر زاہد اکرم درانی نے کرسمس کے پر مسرت موقع پر ملک میں بسنے والی مسیحی برادری اور مسیحی برادری سے تعلق رکھنے والے اراکین پارلیمنٹ کو مبارکباد دیتے ہوئے کہا ہے کہ آئین پاکستان ملک میں بسنے والی اقلیتی برادریوں کو یکساں حقوق فراہم کرتا ہے اور ان کے حقوق کے تحفظ کی ضمانت دیتا ہے۔
ہفتہ کوکرسمس کے موقع پر اپنے پیغام میں سپیکر قومی اسمبلی راجہ پرویز اشرف نے کہا ہے کہ اللہ تعالی نے حضرت عیسی علیہ السلام کو محبت، بھائی چارے اور امن کی تبلیغ کے لیے مبعوث فرمایا۔ انہوں نے کہا کہ مسلمان حضرت عیسی علیہ السلام کو اللہ تعالی کا برگزیدہ اور سچا پیغمبر مانتے ہیں اور ان کا یوم ولادت مسلمانوں کے لیے بھی باعث مسرت ہے۔ سپیکر قومی اسمبلی نے کہا کہ موجودہ حکومت آئین پاکستان اور قائد اعظم محمد علی جناح کے رہمنا اصولوں کے مطابق تمام اقلیتوں کو یکساں حقوق کی فراہمی کے لیے پرعزم ہے۔انہوں نے ملک کی تعمیر و ترقی میں مسیحی برادری کی خدمات کو سراہتے ہوے کہا کہ ملک کی تعمیر و ترقی خصوصا تعلیم، طب اور دیگر شعبوں میں مسیحی برادری کی خدمات قابل ستائش ہیں۔
سپیکر نے دنیا میں پائیدار امن کے قیام کے لیے بین المذاہب ہم آہنگی کو فروغ دینے کی ضرورت پر زور دیتے ہوئے کہا کہ حضرت عیسی علیہ السلام کی امن، محبت اور بھائی چارے کی تعلیمات کو عام کر کے دنیا کو امن کا گہوارہ بنایا جا سکتا ہے۔ اس موقع پر ڈپٹی سپیکر زاہد اکرم درانی نے کہا کہ حضرت عیسی علیہ السلام کے لائے ہوئے محبت، بھائی چارے اور امن کے پیغام پر سب متفق ہیں اور مسلمان ان کو اللہ کا سچا نبی مانتے ہیں۔
انہوں نے ملک کی تعمیر و ترقی میں مسیحی برادری کے کردار کو سراہا۔ انہوں نے ملک کو درپیش چیلنجوں پر قابو پانے کے لیے ملک میں بسنے والے تمام مذاہب کے ماننے والوں میں باہمی تعاون کو فروغ دینے کی ضرورت پر زور دیا۔ ڈپٹی سپیکر نے کرسمس کے پرمسرت موقع پر مسیحی برادری سے تعلق رکھنے والے اراکین پارلیمنٹ اور ملک میں بسنے والی مسیحی برادری کو مبارکباد دی۔
Short Link: https://urdu.app.com.pk/urdu/?p=343143
