لاہور۔7جولائی (اے پی پی):آئی جی پنجاب نے فرض کی راہ میں شہادت کا رتبہ پانے والے ایک اور پولیس آفیسر کی فیملی کو گھر دے دیا،شہید سب انسپکٹر محمد رمضان کے اہل خانہ کو ایک کروڑ 75 لاکھ روپے مالیت کا گھر خرید کر دیا گیا۔
ترجمان پنجاب پولیس کے مطابق شہید کے اہل خانہ کو رحیم یار خان کی نجی ہائوسنگ سوسائٹی میں گھر خرید کر فراہم کیا گیا، شہید سب انسپکٹر محمد رمضان نے 2024 میں اشتہاری مجرمان سے مقابلے کے دوران جام شہادت نوش کیا، شہید سب انسپکٹر محمد رمضان کے اہل خانہ میں اہلیہ، 3 بیٹے اور ایک بیٹی شامل ہیں۔
آئی جی پنجاب ڈاکٹر عثمان انور کی خصوصی کاوش پر حکومت پنجاب نے شہید کے اہل خانہ کو گھر کے لئے فنڈز جاری کئے،آئی جی پنجاب ڈاکٹر عثمان انور نے شہید سب انسپکٹر محمد رمضان کی لازوال قربانی کو بھرپور خراج عقیدت پیش کیا۔
