لاہور۔29اکتوبر (اے پی پی):آئی جی پنجاب ڈاکٹر عثمان انور نے شہادت پانے والے ایک اور پولیس اہلکار کے اہلخانہ کو گھر دے دیا۔ترجمان پنجاب پولیس کے مطابق لاہور پولیس کے کانسٹیبل محمد ارشد کے اہلخانہ کو ایک کروڑ 35 لاکھ روپے مالیت کا گھر دیا گیا ہے۔
شہید کے اہلخانہ کو ان کی پسند کے مطابق جدید سہولیات سے آراستہ لاہور کی نجی ہائوسنگ کالونی میں 5 مرلے کا گھر خرید کر حوالے کیا گیاہے۔کانسٹیبل محمد ارشد نے رواں سال 31 جنوری کو تھانہ شمالی چھائونی کے علاقہ میں مجرموں سے مقابلے کے دوران جام شہادت نوش کیا تھا۔کانسٹیبل کے وارثا میں محمد ارشد شہید کی بیوہ اور 4 بیٹے ہیں۔آئی جی پنجاب کی خصوصی کاوش پر حکومت پنجاب نے شہید کے اہلخانہ کے گھر کیلئے فنڈز جاری کئے
۔آئی جی پنجاب ڈاکٹر عثمان انور نے کانسٹیبل محمد ارشد شہید کی لازوال قربانی کو خراج عقیدت پیش کیا اور کہا کہ کانسٹیبل محمد ارشد نے اپنی جان کی پرواہ کئے بغیر خطرناک جرائم پیشہ عناصر کا بہادری سے مقابلہ کیا۔
پنجاب پولیس اپنے بہادر فرزند کی قربانی کو کبھی فراموش نہیں کرے گی۔ انہوں نے کہا کہ پنجاب پولیس کانسٹیبل محمد ارشد جیسے 1600 سے زائد شہدا، 1700 غازیوں کی امین فورس ہے، شہدا کے اہلخانہ اور غازیوں کے ویلفیئر کیلئے ہر ممکن اقدامات جاری رہیں گے۔
