لاہور۔14مئی (اے پی پی):انسپکٹر جنرل پولیس پنجاب ڈاکٹر عثمان انور کی زیر صدارت سالانہ ترقیاتی پروگرام بارے جائزہ اجلاس سنٹرل پولیس آفس میں منعقد ہوا۔ اجلاس میں ایڈیشنل آئی جی ویلفیئر اینڈ فنانس عمران ارشد، ایڈیشنل آئی جی ٹریننگ طارق رستم چوہان اور ایم ڈی سیف سٹیز اتھارٹی محمد احسن یونس سمیت دیگر سینئر افسران موجود تھے۔ اے آئی جی ڈویلپمنٹ محمد عبداللہ لک نے ترقیاتی منصوبوں کی تکمیل کے لیے سپلیمنٹری گرانٹس کے استعمال بارے بریفنگ دی۔ آئی جی پنجاب نے جاری ترقیاتی منصوبوں کو 30جون تک بہرصورت مکمل کرنے کا حکم دیتے ہوئے کہا کہ وزیر اعلی پنجاب مریم نواز شریف کے محفوظ پنجاب ویژن کے تحت 40 شہروں میں سیف سٹیز کیمروں کا جال بچھایا جا چکا ہے
پنجاب کی 96 نئی سمیت 144 تحصیلوں میں سیف سٹیز کے دائرہ کار کو وسعت دی جارہی ہے،اگلے سال تک پنجاب کی 7ہزار یونین کونسلز میں سیف سٹیز منصوبہ مکمل کریں گے۔ آئی جی پنجاب نے سمارٹ پولیس سٹیشنز، سرحدی اور دریائی چیک پوسٹوں کا تعمیراتی کام مقررہ مدت میں مکمل کرنے کی ہدایت کی۔انہوں نے کہا کہ پولیس ٹریننگ سنٹرز، پولیس لائنز میں بیرکس اور ہاسٹلز کی اپ گریڈیشن کے امور میں تیزی لائی جائے۔ ترجمان پنجاب پولیس نے بتایا کہ آر پی اوز، سی پی اوز اور ڈی پی اوز سمیت متعلقہ افسران نے ترقیاتی منصوبوں کو مقررہ مدت میں مکمل کروانے کی یقین دہانی کروائی۔
ایڈیشنل آئی جی سائوتھ پنجاب، ایڈیشنل آئی جی سی ٹی ڈی، آر پی اوز، سی پی اوز، ڈی پی اوز سمیت سپیشل برانچ، ایس پی یو اور پی ایچ پی کے متعلقہ افسران نے بذریعہ ویڈیو لنک اجلاس میں شرکت کی۔
Short Link: https://urdu.app.com.pk/urdu/?p=597121
