لاہور۔17مئی (اے پی پی):انسپکٹر جنرل پولیس پنجاب ڈاکٹر عثمان انور نے شاندار کارکردگی کا مظاہرہ کرنے والے43 پولیس ایتھلیٹس کیلئے 22 لاکھ 15 ہزار روپے کیش انعامات اور تعریفی اسناد کی منظوری دیدی ۔
ترجمان پنجاب پولیس نے بتایا کہ انعامات حاصل کرنے والوں میں ایتھلیٹس، کوچز، منیجرزاور کھلاڑی شامل ہیں، رواں سال پولیس ایتھلیٹس نے مختلف نیشنل سپورٹس ایونٹس میں 18 میڈلز حاصل کئے۔ترجمان کے مطابق میڈلز جیتنے والوں میں 04 خواتین پولیس ایتھلیٹنس بھی شامل ہیں، پولیس ایتھلیٹس نے 03 گولڈ، 04 سلور اور 11 کانسی کے تمغے اپنے نام کیے۔
پولیس کھلاڑیوں نے باڈی بلڈنگ، گالف ٹورنامنٹ، ویٹ لفٹنگ، ریسلنگ، جوڈو، ووشو کنگفو اوررسہ کشی میں بھی میڈلز جیتے۔ آئی جی ڈاکٹر عثمان انور نے کہا کہ پنجاب پولیس کی سپورٹس ٹیمیں قومی و صوبائی سطح پر مسلسل کامیابیاں سمیٹ رہی ہیں،قومی کھیلوں میں میڈلز جیتنے والے کھلاڑی پنجاب پولیس کا فخر ہیں۔ڈاکٹر عثمان انور نے مزید کہا کہ پولیس کھلاڑیوں کی حوصلہ افزائی اور سرپرستی کیلئے بھرپور اقدامات جاری رہیں گے۔
Short Link: https://urdu.app.com.pk/urdu/?p=598280
