لاہور۔15اپریل (اے پی پی):لاہور، ایڈیشنل آئی جی، ڈی آئی جی آئی اے بی اور اے آئی جی شہریوں کی شکایات سن کر فوری ازالہ کر رہے ہیں۔ ترجمان پنجاب پولیس نے بتایا کہ رواں سال تین ماہ میں آئی جی پی شکایت سنٹر1787 پر 35 ہزارشکایات موصول ہوئیں جبکہ94 فیصدحل کی جاچکی ہیں۔ 1787 پر روزانہ کی بنیاد پر ایک ہزار سے زائد شکایات کے حل کیلئے احکامات جاری کیے جارہے ہیں۔ ترجمان نے مزید بتایا کہ شہریوں کی شکایات پر 2805 مقدمات کا اندراج کیا گیا ہے۔
ایف آئی آر کے اندراج، ناقص تفتیش اور تبدیلی تفتیش کے متعلق شکایات کا ازالہ کیا گیا۔ پولیس افسران و اہلکاروں کے خلاف اور پولیس سروسز سے متعلق شکایات کو حل کیا جاتا ہے۔محکمانہ، حاضر سروس، شہدا اور ریٹائرڈ آفیسرز کی شکایات کا بھی ازالہ کیا جارہا ہے۔ شکایات کے اندراج کے بعد متعلقہ فیلڈ آفیسر، ایس ڈی پی او سے لیکر آر پی اوز تک بھیجی جاتی ہیں۔ متعلقہ آفیسر 24 گھنٹوں میں درخواست دہندہ سے رابطہ کر کے آئی جی پی کمپلینٹ سینٹر کو رپورٹ بیک کرنے کا پابند ہوتا ہے۔ شہری روزانہ صبح 8 سے رات 10 بجے تک آئی جی شکایت سنٹر1787 کال کر کے اپنی شکایت درج کرواسکتے ہیں۔
آئی جی پنجاب نے افسران کو ہدایت دیتے ہوئے کہا کہ جاری کردہ ایس او پیز کے مطابق مقررہ ٹائم لائن کے اندر درخواست دہندہ کی داد رسی اور فری رجسٹریشن آف ایف آئی آر پالیسی پر سختی سے عملدرآمد یقینی بنائیں۔
Short Link: https://urdu.app.com.pk/urdu/?p=582365
