لاہور ۔ 20 فروری (اے پی پی) انٹرنیشنل کرکٹ کونسل (آئی سی سی) نے قومی ٹیم کے کپتان سرفراز احمد کو سپاٹ فکسنگ کی پیشکش کرنے پر عرفان انصاری پر 10 سال کی پابندی عائد کردی۔ عرفان انصاری نے اکتوبر 2017ءمیں پاکستان اور سری لنکا کے مابین ون ڈے سیریز کے دوران سرفراز احمد کو فکسنگ کرنے پر آمادہ کرنے کی کوشش کی تھی لیکن انہوں نے پیشکش ٹھکراتے ہوئے فوری طور پر اس پیشکش کی رپورٹ آئی سی سی کے اینٹی کرپشن یونٹ کو کر دی تھی جس کے بعد آئی سی سی اینٹی کرپشن یونٹ نے تحقیقات کا آغاز کر دیا تھا۔ تحقیقات میں عرفان انصاری پر تین الزامات درست ثابت ہوئے۔ یو اے ای میں دو ڈومیسٹک ٹیموں کی کوچنگ اور پاکستان کرکٹ کے ساتھ وابستہ ہونے کی وجہ سے وہ اینٹی کرپشن کوڈ کے پابند تھے۔ آئی سی سی اینٹی کرپشن یونٹ کے جنرل منیجر الیکس مارشل کا کہنا ہے کہ واقعہ کی فوری طور پر رپورٹ کرنے پر سرفراز احمد کا شکریہ ادا کرتے ہیں، انہوں نے ایک اچھے قائد اور پروفیشنل ہونے کا ثبوت دیتے ہوئے پیشکش کو مسترد کرکے ہمیں مطلع کیا۔ انہوں نے تحقیقات اور بعدازاں ٹریبونل کی کارروائی میں بھی مدد فراہم کی۔
