لاہور۔14اپریل (اے پی پی):پاکستان ویمنز کرکٹ ٹیم نے آئی سی سی ویمنز ورلڈ کپ کوالیفائر میں اپنے تیسرے میچ میں ویسٹ انڈیز ویمنز کرکٹ ٹیم کو 65 رنز سے شکست دے دی۔اس ٹورنامنٹ میں پاکستان کی یہ مسلسل تیسری کامیابی ہے، اس سے قبل پاکستان نے آئرلینڈ کو38رنز سے اور اسکاٹ لینڈ کو6وکٹوں سے شکست دی تھی، ویسٹ انڈیز کی تین میچوں میں یہ دوسری شکست ہے۔
قذافی اسٹیڈیم لاہور میں پیر کے روز کھیلے گئے اس ڈے نائٹ میچ میں پاکستان نے ٹاس جیت کر پہلے بیٹنگ کی اور پوری ٹیم 49.5اوورز میں 191 رنز بناکر آئوٹ ہوگئی۔ویسٹ انڈیز کی ٹیم 39.2اوورز میں 126رنز بناکر آئوٹ ہوگئی۔پاکستان کی اننگز میں سدرہ امین نے 94گیندوں پر54رنز اسکور کئے
جس میں 4چوکے شامل تھے، منیبہ علی نے 60 گیندوں پر33 رنز کی اننگز کھیلی جس میں4چوکے شامل تھے،سدرہ نواز نے23 رنز بنائے۔ویسٹ انڈیز کی طرف سے کپتان ہیلی میتھیوز نے30 رنز دے کر2وکٹیں حاصل کیں،ایفی فلیچر اور کرشما رامارک نے بھی بالترتیب39اور 55 رنز دے کر دو دو کھلاڑیوں کو آئوٹ کیا۔
پاکستان کو ویسٹ انڈیز کی اننگز کی پہلی گیند پر ہی اہم کامیابی حاصل ہوگئی جب کپتان فاطمہ ثنا نے اپنی ہم منصب ہیلی میتھیوز کو ایل بی ڈبلیو کردیا، 15کے مجموعی اسکور پر ویسٹ انڈیز کی دوسری وکٹ گری جب شیمین کیمبل تین چوکوں کی مدد سے 14رنز بناکر رن آئوٹ ہوگئیں،54 رنز تک پہنچنے پر ویسٹ انڈیز کی ٹیم پانچ وکٹوں سے محروم ہوچکی تھی
جن میں دو بیٹرز جینالی گلاسگو اور شنالی ہنری کو لیفٹ آرم اسپنر نشرہ سندھو نے اپنے پہلے ہی اوور میں آئوٹ کردیا۔پاکستان کو ایک اور اہم کامیابی اسوقت حاصل ہوئی جب رامین شمیم نے ایک چھکے اور ایک چوکے کی مدد سے17رنز بنانے والی اسٹیفینی ٹیلر کو آئوٹ کردیا،اس وقت ویسٹ انڈیز کا اسکور6وکٹوں پر 87رنز تھا، 10رنز کے اضافے پر فاطمہ ثنا نے اپنی دوسری وکٹ شابیکا کو آئوٹ کرکے حاصل کرلی اور اپنی ٹیم کو جیت سے مزید قریب کردیا۔
اس موقع پر سعدیہ اقبال بھی ایکشن میں آئیں اور انہوں نے ایفی فلیچر کی وکٹ حاصل کی۔فاطمہ ثنا نے اننگز میں اپنی تیسری وکٹ اشمینی مونیسر کو آئوٹ کرکے حاصل کی اور پھر 126کے مجموعی اسکور پر رامین شمیم نے ویسٹ انڈیز کی آخری وکٹ آلیا ایلین کو آئوٹ کرکے پاکستان کی جیت کو مکمل کردیا۔
فاطمہ ثنا نے16رنز دے کر3وکٹیں حاصل کیں جبکہ نشرہ سندھو نے 31اور رامین شمیم نے 26رنز کے عوض دو، دو کھلاڑیوں کو پویلین کی راہ دکھائی،سدرہ امین پلیئر آف دی میچ قرار پائیں۔
ترجمان پی سی بی کے مطابق پاکستان ویمنز اپنا چوتھا میچ 17اپریل کو تھائی لینڈ کے خلاف کھیلے گی جبکہ اس کا آخری میچ 19اپریل کو بنگلہ دیش کے خلاف ہوگا۔
Short Link: https://urdu.app.com.pk/urdu/?p=581985
