گراس آئیلٹ۔18جون (اے پی پی):آئی سی سی ٹی 20 ورلڈ کپ میں ویسٹ انڈیز نے افغانستان کو بآسانی 104 رنز سے شکست دے دی ، 219 رنز کے بڑے ہدف کے تعاقب میں افغان ٹیم 114 رنز پر ڈھیر ہو گئی ، عبید میکوئے نے تین کھلاڑیوں کو آؤٹ کیا ، نکولس پوران کو 98 رنز کی دلکش اننگز کھیلنے پر مرد میدان قرار دیا گیا ، گراس آئیلٹ میں کھیلے گئے میگا ایونٹ کے 40 ویں میچ میں میزبان ٹیم ویسٹ انڈیز نے پہلے بیٹنگ کرتے ہوئے مقررہ 20 اوورز 5 وکٹوں کے نقصان پر 218 رنز بنائے ، نکولس پوران نے 53 گیندوں پر 98 رنز کی دھواں دار اننگز کھیلی
جس میں 8 چھکے اور 6 چوکے شامل تھے ، جونسن چارلس 43 رنز کے ساتھ دوسرے نمایاں بیٹر رہے ، افغانستان کے گلبدین نائب نے دو کھلاڑیوں کو آؤٹ کیا ، افغانستان کی ٹیم مطلوبہ ہدف حاصل کرنے میں ناکام رہی اور پوری ٹیم 16.2 اوورز میں 114 رنز بنا کر آؤٹ ہو گئی ، ابراہیم زدران 38 ، عظمت اللہ عمر زئی 23 اور راشد خان 18 رنز کے ساتھ نمایاں رہے ، ویسٹ انڈیز کی جانب سے عبید میکوئے نے تین جبکہ عقیل حسین اور گڈاکیش موتی نے دو ، دو کھلاڑیوں کو آؤٹ کیا ۔
Short Link: https://urdu.app.com.pk/urdu/?p=477292
