اسلام آباد۔15مئی (اے پی پی):علماء و مشائخ کونسل اجلاس میں طے پایا ہے کہ آج(جمعہ کو)ملک بھر میں یوم امن و یوم تشکر منایا جائے گا جس میں افواج پاکستان سے یکجہتی اور اللہ تعالیٰ کا شکر ادا کیا جائے گا کہ اس نے پاکستان کو دشمنوں کے شر سے محفوظ رکھا، ملک بھر کے علماء کرام نماز جمعہ کے اجتماعات میں مساجد و مدارس میں خصوصی دعائیہ تقریبات کا اہتمام کریں گے۔ جمعرات کو قومی علما ومشائخ کونسل کی منعقدہ کانفرنس کے مشترکہ اعلامیہ میں کہا گیا ہے کہ تمام مکاتب فکر کے علماء کرام سے گزارش ہے کہ امت مسلمہ میں رواداری، محبت اور بھائی چارے کو فروغ دیں،نفرت انگیز تقاریر اور فتویٰ بازی سے پرہیز کیا جائے،مساجد کو صرف عبادات کیلئے نہیں بلکہ مساجد کو بطور کمیونٹی سینٹر بحال کیا جائے تاکہ تعلیم و تربیت اور سماجی خدمات دی جاسکیں،اس حوالے سے علماء کرام کی تجاویز پر بھی غور کیا جائے گا۔
مشترکہ اعلامیہ میں کہا گیا کہ بھارت کی جانب سے پاکستان کے دینی مدارس، مساجد اور بچوں پر حملوں کی شدید مذمت کرتے ہیں،علماء کرام بھارت کا مکروہ چہرہ پوری دنیا کے سامنے بے نقاب کرنے کیلئے اپنا کردار ادا کریں،یہ کونسل نہتے فلسطینی عوام پر اسرائیلی مظالم کی شدید مذمت کرتی ہے اور عالمی برادری سے مطالبہ کرتے ہیں کہ فلسطینیوں پر اسرائیلی مظالم کو رکوانے کیلئے اپنا کرداد ادا کریں،یہ کونسل کشمیری مسلمانوں کی جدوجہد آزادی کی حمایت کرتی ہےاور مطالبہ کرتے ہیں کہ اقوام متحدہ کی قراردادوں کے مطابق کشمیریوں کو ان کا حق خودارادیت دیا جائے،پاکستان کی موجودہ صورتحال میں علماء و مشائخ کا انتہائی اہم کردار ہے،علماء کرام نوجوانوں کی فکری رہنمائی،دینی تربیت اور تعمیری کے فروغ کیلئے اپنا کرداد ادا کریں۔علماء کرام میڈیا پر دینی اور قومی بیانیہ مضبوط بنانے کیلئے منظم انداز میں اپنا کردار ادا کریں گے تاکہ عوام کو درست معلومات فراہم ہو سکیں ۔
Short Link: https://urdu.app.com.pk/urdu/?p=597611
ملک بھر میں یوم امن و یوم تشکر منایا جائے گا، افواج پاکستان سے یکجہتی اور اللہ تعالیٰ کا شکر ادا کیا جائے گا، علماء و مشائخ کونسل){kind=link}