باکو ۔21اگست (اے پی پی):آذربائیجان نے با ضابطہ طور پر برکس کی درخواست پیش کر دی۔الجزیرہ کے مطابق آذربائیجان کی وزارت خارجہ کے ترجمان آئیحان حاجی زادہ نے کہا کہ ان کے ملک نے برکس کا رکن بننے کے لیے باضابطہ درخواست دی ہے۔آذربائیجان اور چین کے درمیان "تزویراتی شراکت داری کے قیام سے متعلق مشترکہ اعلامیہ” قازقستان کے دارالحکومت آستانہ میں 3-4 جولائی کو منعقدہ شنگھائی تعاون تنظیم کے سربراہان مملکت کے سربراہی اجلاس کے دائرہ کار میں منظور کیا گیا۔
اعلامیہ میں واضح کیا گیا ہے کہ آذربائیجان کی برکس میں شمولیت کی خواہش کا اظہار کیا گیا اور یہ بھی بتایا گیا کہ چین نے اس درخواست کا خیر مقدم کیا ہے۔روسی صدر ولادیمیر پوتن کے 18-19 اگست کو آذربائیجان کے سرکاری دورے کے دائرہ کار میں منظور کیے گئے مشترکہ اعلامیہ میں کہا گیا تھا کہ روس برکس میں آذربائیجان کی شرکت کی حمایت کرتا ہے۔
جون 2006 کو سینٹ پیٹرزبرگ انٹرنیشنل اکنامک فورم میں برازیل، روس، بھارت اور چین نے ملکر برکس کی بنیاد ڈالی تھی، 2010 میں جنوبی افریقہ اور اس سال مصر، ایتھوپیا کی شرکت سے ایک کثیر القومی تنظیم کے طور پر تشکیل دیا گیا تھا۔ ، ایران اور متحدہ عرب امارات کی بھی شمولیت سے اسے مزید وسعت ملی ۔ 40 سے زائد ممالک نے برکس میں شمولیت کے لیے درخواستیں دی ہیں۔
