راولپنڈی۔ 07 فروری (اے پی پی):ڈائریکٹر جنرل راولپنڈی ڈویلپمنٹ اتھارٹی کنزہ مرتضیٰ کی ہدایات پر ٹریفک کی روانی اور عوامی تحفظ کو بہتر بنانے کیلئے آر ڈی اے کے انفورسمنٹ سکواڈ نے نالہ لئی کے ساتھ رتہ امرال روڈ پر قائم تجاوزات، غیر قانونی مویشیوں کے 6 باڑوں، 3 دکانوں، 3 واش رومز اور ایک سنوکر کلب کو مسمار کر دیا ۔ ترجمان آر ڈی اے کے مطابق اس آپریشن کا مقصد سڑکوں تک رسائی کو بڑھانا، نظم و نسق کو بحال کرنا اور مسافروں و پیدل چلنے والوں کے لیے محفوظ ماحول فراہم کرنا تھا۔ یہ کارروائی متعلقہ پولیس چوکی رتہ امرال راولپنڈی کی پولیس کے تعاون سے کی گئی۔ ڈائریکٹر جنرل آر ڈی اے کنزہ مرتضیٰ نے کہا کہ یہ کارروائی شہر کے بنیادی ڈھانچے کی بحالی اور سڑکوں کو عوام کے لیے محفوظ بنانے کی ہماری مسلسل کوششوں کا حصہ ہے،
تجاوزات نہ صرف ٹریفک کی روانی میں رکاوٹ ڈالتی ہیں بلکہ یہ عوامی تحفظ کے لیے بھی ایک بڑا خطرہ بن جاتی ہیں، آر ڈی اے شہری مقامات کی سالمیت کے تحفظ کے لیے پرعزم ہے۔ انہوں نے مزید کہا کہ اس طرح کی کارروائیاں راولپنڈی بھر میں جاری رہیں گی،آر ڈی اے عوام الناس سے درخواست کرتا ہے کہ وہ تجاوزات سے پاک زونز کو برقرار رکھنے میں تعاون کریں تاکہ راولپنڈی کی سڑکیں محفوظ، قابل رسائی اور رش سے پاک رہیں۔ انفورسمنٹ ایکشن کی قیادت آر ڈی اے انفورسمنٹ سکواڈ کے ممبران نے کی، جن میں ڈائریکٹر لینڈ غضنفر علی اعوان، اسسٹنٹ ڈائریکٹر بلڈنگ کنٹرول محمد داؤد جٹ، بلڈنگ سرویئرز عامر محمود ملک، بلڈنگ انسپکٹر شہزاد اور دیگر آر ڈی اے عملہ شامل تھے، جنہوں نے پولیس کے تعاون سے کارروائی کی۔
