راولپنڈی۔ 06 مارچ (اے پی پی):ڈویژنل انٹیلی جنس کمیٹی کی ہدایات پر عمل کرتے ہوئے راولپنڈی ڈویلپمنٹ اتھارٹی ٹاسک فورس نے غیر قانونی ہاؤسنگ سکیموں کے خلاف کارروائیاں تیز کر دی ہیں۔ آر ڈی اے انفورسمنٹ سکواڈ نے چار غیر قانونی ہاؤسنگ سکیموں جن میں الحرم سٹی فیز I پارٹ-II، پارک زمین ٹاؤن، یونیورسٹی ہومز اور لینڈ سب ڈویژن (ظہیر بنگیال) شامل ہیں، جو کولیاں پر اور موضع مسریوٹ تحصیل و ضلع راولپنڈی میں واقع ہیں کو نشانہ بنایا گیا۔
آر ڈی اے ترجمان کے مطابق آپریشن کے نتیجے میں ان غیر قانونی ہاؤسنگ سکیموں کے سائیٹ دفاتر، روڈ انفراسٹرکچر، بجلی کے کھمبے، سڑک کی باڑ، گرلز، کرب سٹون، کنٹینرز، فٹ پاتھ اور سائیڈ ڈرین کو مسمار و سر بمہر کر دیا گیا ہے۔ کریک ڈاؤن کی نگرانی ڈائریکٹر جنرل کنزہ مرتضیٰ نے کی، جنہوں نے دھوکہ دہی کے طریقوں سے نمٹنے اور شہریوں کو استحصال سے بچانے کے لیے اس طرح کی کارروائیاں جاری رکھنے کی ضرورت پر زور دیا۔
ڈی جی آر ڈی اے نے کہا کہ کمشنر راولپنڈی کی رہنمائی میں ہم غیر قانونی ہاؤسنگ سوسائٹیوں کے خاتمے کے لیے مضبوط انداز اپنانے کے لیے پرعزم ہیں۔ انہوں نے زور دے کر کہا کہ ہاؤسنگ سکیم مالکان کی جانب سے زمینوں پر ناجائز قبضوں سے متعلق عوامی شکایات کو سنجیدگی سے لیا جا رہا ہے اور زمینوں پر زبردستی قبضے میں ملوث افراد کے خلاف سخت کارروائی کی جائے گی۔
انہوں نے کہا اس کے علاوہ عوام الناس کی حوصلہ افزائی کی جاتی ہے کہ وہ آر ڈی اے کی ویب سائٹ (www.rda.gop.pk) پر چیک کریں اور صرف منظور شدہ ہاؤسنگ سکیموں سے خرید و فروخت کریں۔ غیر قانونی اشتہارات، بکنگ اور ڈیویلپمنٹ کو روکنے کے لیے سابقہ وارننگ کے باوجود مذکورہ ہاؤسنگ سکیموں کے مالکان نے قواعد و ضوابط کی خلاف ورزی کرتے ہوئے بکنگ دفاتر کا کام جاری رکھا ہوا تھا۔ مشترکہ آپریشن ٹیم میں آر ڈی اے اور تھانہ دھمیال چکری روڈ راولپنڈی کے اہلکار شامل تھے۔
Short Link: https://urdu.app.com.pk/urdu/?p=569568
