آزاد کشمیر میں سکیورٹی انتظامات کو بہتر بنایا جائے گا، آزاد کشمیر کے عوام سے کئے وعدے پورے کر رہے ہیں، محسن نقوی

اسلام آباد۔23جون (اے پی پی):وفاقی وزیر داخلہ و انسداد منشیات محسن نقوی نے کہا ہے کہ آزاد کشمیر میں سکیورٹی سے متعلق انتظامات کو بہتر بنایا جائے گا، آزاد کشمیر کے عوام سے کئے وعدے پورے کر رہے ہیں۔ وزارت داخلہ کی جانب سے اتوار کو جاری اعلامیہ کے مطابق وزیراعظم آزاد کشمیر چوہدری انوارالحق نے وزارت داخلہ میں وفاقی وزیر داخلہ و انسداد منشیات محسن نقوی سے ملاقات کی ہے۔ اس موقع پر آزاد کشمیر میں امن وامان اور سکیورٹی صورتحال پر تفصیلی تبادلہ خیال ،سیاسی صورتحال اور آزاد کشمیر کے نئے مالی سال کے بجٹ کے حوالے سے بھی بات چیت کی گئی۔

وفاقی وزیرداخلہ محسن نقوی نے وزیراعظم آزاد کشمیر کی درخواست پر آزاد کشمیر میں فرنٹیئر کانسٹیبلری تعینات کرنے کی منظوری دے دی۔ انہوں نے کہا کہ آزاد کشمیر میں قیام امن کیلئے ہر ممکن تعاون کریں گے،آزاد کشمیر میں سکیورٹی سے متعلق انتظامات کو بہتر بنایا جائے گا، آزاد کشمیر کے عوام سے کئے وعدے پورے کر رہے ہیں۔ محسن نقوی نے مزید کہا کہ حکومت پاکستان آزاد کشمیر حکومت اور عوام کے ساتھ کھڑی ہے، آزاد کشمیر کی خوشحالی اور ترقی کیلئے ہر ممکن تعاون کیا جائے گا۔وزیراعظم آزاد جموں و کشمیر نے مسائل کے حل کے لئے فوری اقدامات پر وفاقی وزیرداخلہ محسن نقوی سے اظہار تشکر کیا۔

Short Link: https://urdu.app.com.pk/urdu/?p=478212