میلبورن۔ 30 دسمبر (اے پی پی) آسٹریلیا نے انگلینڈ کے خلاف شیڈول پانچویں اور آخری ایشز ٹیسٹ میچ کیلئے لیفٹ آرم سپنر آشٹن ایگر کو ٹیم میں طلب کر لیا، آسٹریلیا اور انگلینڈ کے درمیان آخری ٹیسٹ 4 جنوری سے سڈنی میں شروع ہو گا اور میزبان ٹیم کو سیریز میں 3-0 کی فیصلہ کن برتری حاصل ہے۔ آشٹن ایگر نے 2013ءمیں انگلینڈ کے خلاف ڈیبیو ٹیسٹ میں 98 رنز کی عمدہ اننگز کھیل کر انٹرنیشنل کرکٹ میں جاندار انٹری کی تھی تاہم انہیں صرف دو ایشز ٹیسٹ میں ٹیم کی نمائندگی کا موقع مل سکا تھا، اس کے بعد رواں برس دورہ بنگلہ دیش کیلئے انہیں دوبارہ سکواڈ میں شامل کیا گیا تھا، انہوں نے چار میچز میں 9وکٹیں لے رکھی ہیں، سڈنی کی وکٹ روایتی طور پر سپنرز کیلئے موزوں ہے اسلئے انہیں اضافی طور پر سکواڈ میں شامل کیا گیا ہے، اگر آسٹریلوی ٹیم نے آخری ٹیسٹ میں پلیئنگ الیون میں دوسرا سپنر کھیلانے کا فیصلہ کیا تو امکان ہے کہ ایگر کو موقع ملے گا۔
Short Link: https://urdu.app.com.pk/urdu/?p=83440
