پشاور۔ 18 مئی (اے پی پی):وفاقی وزیر و صدر مسلم لیگ (ن) خیبر پختونخوا انجینئر امیر مقام نے کہا ہے کہ پاک فوج کو سلام پیش کرتے ہیں جنہوں نے دشمن کو منہ توڑ جواب دیا، آپریشن بنیان مرصوص کی کامیابی میں وزیراعظم پاکستان محمد شہباز شریف نے بہترین کپتان کا کردار ادا کیا، کوہستان میں 40 ارب روپے کے میگا فنانشل سکینڈل کی تحقیقات پر قومی احتساب بیورو کو سراہتے ہیں، وہ اس کرپشن کیس کی مکمل تحقیقات کریں گے، کوہستان میں 40 ارب روپے کے میگا مالیاتی سکینڈل کی مذمت کرتے ہیں۔
ان خیالات کا اظہار انہوں نے اتوار کو لاچی کوہاٹ میں منعقدہ گرینڈ شمولیتی تقریب سے خطاب کرتے ہوئے کیا جس میں لاچی کوہاٹ سے جے یو آئی (ف) کے رہنما سابق ایم پی اے میجر شادت خان کے بھائی اور سابق وزیر و ڈپٹی اسپیکر شاد محمد خان کے صاحبزادے فواد خان نے اپنے خاندان اور ساتھیوں سمیت مسلم لیگ (ن) میں باضابطہ شمولیت اختیار کی۔ یہ خیبر پختونخوا کے ضلع کرم سے رکن صوبائی اسمبلی (ایم پی اے) علی ہادی کے بعد ایک اور اہم سیاسی شخصیت کی مسلم لیگ (ن) میں شمولیت ہے۔
تقریب کے دوران انجینئر امیر مقام نے نئے شامل ہونے والوں کو پارٹی کی روایتی کیپ پہنائی۔ تقریب سے خطاب کرتے ہوئے وفاقی وزیر انجینئر امیر مقام نے کہا کہ پاک فوج نے بھارتی جارحیت کا بھرپور جواب دیا ہے، جس سے دشمن کو واضح پیغام گیا ہے کہ یہ قوم بیدار اور متحد ہے۔ پاک فوج کو سلام پیش کرتے ہیں جنہوں نے دشمن کو منہ توڑ جواب دیا، افواج پاکستان ہماری سرحدوں کی محافظ ہیں اور پچیس کروڑ پاکستانی عوام اپنی افواج کے شانہ بشانہ کھڑی ہے۔
افواج پاکستان نے دنیا بھر میں پاکستان کا سر فخر سے بلند کیا ہے، پوری قوم اپنی افواج کی پشت پر کھڑی ہے۔ وفاقی وزیر انجینئر امیر مقام نے آپریشن "بنیان مرصوص” کو قومی سلامتی کی حفاظت میں ایک تاریخی کامیابی قرار دیا۔ انہوں نے کہا کہ یہ آپریشن سیاسی اور عسکری قیادت کے ساتھ قوم کے مکمل اتحاد کا مظہر ہے، پاک فوج کے شہداء اور جوانوں کو خراج تحسین پیش کرتے ہیں جنہوں نے اپنی جانوں کے نذرانے دے کر ملک کی حفاظت کو یقینی بنایا۔ وفاقی وزیر انجینئر امیر مقام نے کہا کہ آج کا پاکستان مضبوط قیادت کے زیرِ سایہ ہے جہاں قومی یکجہتی، سیاسی استحکام اور ترقیاتی تسلسل کو اولین ترجیح دی جا رہی ہے۔
انہوں نے کہا کہ فواد خان اور ان کے ساتھیوں کی شمولیت نہ صرف مسلم لیگ (ن) کی بڑھتی ہوئی عوامی مقبولیت کا اعتراف ہے بلکہ قائد محمد نواز شریف اور وزیراعظم شہباز شریف کی شاندار کارکردگی پر عوامی اعتماد کا مظہر بھی ہے۔ انہوں نے کہا کہ مسلم لیگ (ن) عوامی خدمت، ملکی ترقی اور فلاح و بہبود کے مشن پر کاربند ہے، خیبرپختونخوا میں پارٹی کی مضبوطی کےلیے یہ شمولیت ایک اہم قدم ہے، پارٹی کو مضبوط کرنا اور عوامی خدمت کے جذبے کو فروغ دینا مسلم لیگ (ن) کی اولین ترجیح ہے، نئے شامل ہونے والے افراد کا جذبہ اور اخلاص پارٹی کےلیے ایک قیمتی اثاثہ ثابت ہوگا۔
تقریب کے شرکاء نے پاکستان زندہ باد، افواج پاکستان زندہ باد، وزیراعظم پاکستان میاں محمد شہباز شریف زندہ باد اور آرمی چیف جنرل سید عاصم منیر زندہ باد کے فلک شگاف نعرے لگائے۔ تقریب میں مسلم لیگ (ن) کے رہنما رحمت سلام خٹک، جنرل سیکرٹری مسلم لیگ (ن) کوہاٹ حکم بادشاہ اور مسلم لیگ (ن) ضلع کرک کے صدر میاں اخلاق بھی موجود تھے۔
خاندان اور ہزاروں ساتھیوں سمیت مسلم لیگ (ن) میں شمولیت اختیار کرنے والوں میں جے یو آئی (ف) کے رہنما فواد خان، سابق ایم پی اے میجر ریٹائرڈ شہداد خان، سابق تحصیل کونسلر مومن شاہ ایڈووکیٹ، سابق صدر اے این پی تحصیل لاچی ارشد، سابق ناظم دیہی لاچی خان، سابق ناظم لاچی پایاں حاجی گل مالی شاہ، سابق ممبر لاچی اربن کونسل حاجی گل خان شاہ، سابق ممبر صوبائی کونسل حاجی گل خان شاہ، عبدالعزیز ، حنیف، سابق ناظم حاجی حیات خان، سابق تحصیل کونسلر شاد منیر، کونسلر سردار داؤد، اعجاز ایڈووکیٹ، چیئرمین ویلج کونسل کفایت ، چیئرمین ویلج کونسل منصور خان اور دیگر بھی شامل تھے۔
Short Link: https://urdu.app.com.pk/urdu/?p=598450
