ابوظہبی۔6مئی (اے پی پی):ابوظہبی میں پاکستان کے سفارت خانے نے نیشنل ڈیفنس یونیورسٹی (این ڈی یو) اسلام آباد کے نیشنل سکیورٹی اینڈ وار کورس کے وفد کی متحدہ عرب امارات کے غیر ملکی مطالعاتی دورے کے دوران میزبانی کی۔ سفارتخانے سے جاری بیان کے مطابق دورے کا مقصد پاکستان اور متحدہ عرب امارات کے درمیان دو طرفہ مذاکرات، علمی تعاون اور باہمی افہام و تفہیم کو فروغ دینا ہے۔
پاکستانی سفارتخانہ کی جانب سے جاری بیان کے مطابق متحدہ عرب امارات میں پاکستان کے سفیر فیصل نیاز ترمذی نے این ڈی یو کے اے او ڈ ی چیف انسٹرکٹر ایئر وائس مارشل عامر منیر اور وفد کا استقبال کیا جس میں اعلیٰ عسکری اور سول سروس افسران کے ساتھ ساتھ دوست ممالک کے افسران بھی شامل تھے۔ سفیر نے دوطرفہ تعاون کو گہرا کرنے میں اس طرح کے تبادلوں کی اہمیت پر زور دیا۔ انہوں نے کہا کہ یہ دورہ پاکستان اور متحدہ عرب امارات کی تاریخی شراکت داری کو مضبوط بنانے کے ہمارے عزم کی بھی عکاسی کرتا ہے۔
اپنے دورے کے دوران وفد متحدہ عرب امارات کے سرکاری حکام، تھنک ٹینکس اور یو اے ای کے دیگر اداروں کے ساتھ اعلیٰ سطحی ملاقاتیں کرے گا۔ وفد کا دورہ دونوں برادر ممالک کے درمیان لازوال تعلقات کا منہ بولتا ثبوت ہے۔
Short Link: https://urdu.app.com.pk/urdu/?p=593188
