سیالکوٹ۔25اپریل (اے پی پی):معاون خصوصی وزیر اعلی پنجاب ڈاکٹر فردوس عاشق اعوان نے کہا ہے احتساب اور انصاف پی ٹی آئی کا نعرہ ہے اس کی آڑ میں کسی سے زیادتی یا ریلیف نہیں دیں گے, کورونا کی وباء بُری طرح پھیل چکی ہے اس سے نمٹنے کیلئے تمام سیاسی لیڈروں کو اپنی سیاست کو چند روز کیلئے بھول کرعوام کو بچانے پر اپنی توانائیاں صرف کرنے کی ضرورت ہے ۔ ان خیالات کا اظہار انہوں نے کورونا ویکسی نیشن سنٹر سیالکوٹ میں میڈیا کے نمائندگان گفتگو کرتے ہوئے کیا ۔
معاون خصوصی وزیر اعلی پنجاب ڈاکٹر فردوس عاشق اعوان نے کہا کہ حکومت پنجاب نےجن اضلاع میں 5فیصد کورونا کی شرح تھی ان کو اضلاع کو بند کرنے کا فیصلہ کیا ہے۔صوبہ کے25اضلاع جہاں پر کورونا کے مثبت آنے کی شرح 5فیصد ہے ان میں سیالکوٹ بھی شامل ہے تمام تعلیمی اداروں کو بند کرنے کا فیصلہ کیا گیاہے باقی 11 اضلاع جن میں 5فیصد سے کم ہے وہاں تعلیمی سرگرمیاں جاری رہیں گی۔اس سلسلہ میں محکمہ تعلیم نے اضلاع کی لسٹ جاری کردی ہے۔اس وقت پنجاب بھر میں ہسپتالوں میں وینٹی لیٹر اور آکسیجن کی فراہمی جاری ہے۔
بھارت میں کورونا نے تباہی پھیلا دی ہے۔پاکستان اس طرح ہنگامی صورتحال سے نمٹنے اور جذبہ خیر سگالی کے طور پر ہندوستان کو تمام ضروری سامان انسانی بنیاد پر بھجوانے کا فیصلہ کیا ہے۔انہوں نے کہا کہ پنجاب حکومت زیادہ سے زیادہ کورونا ویکسینیشن کیلئے تمام وسائل بروئے کار لا رہی ہے اور اس موذی مرض کی روک تھام کیلئے دن رات ایک کیے ہوئے ہے۔پنجاب حکومت اب تک 9 لاکھ 34 ہزار سے زیادہ لوگوں کو کورونا ویکسین لگا چکی ہے,روزانہ اوسطاً 25 ہزار سے زیادہ افراد کو کورونا ویکسینیشن لگائی جا رہی ہے ۔
60 سال سے زیادہ عمر کے 7.4 ملین افراد ہیں جن میں سے 4 لاکھ 70 ہزار سے زیادہ افراد کو کو کورونا ویکسینیشن لگائی جا چکی ہے۔50 سال سے 59 سال کے افراد کی تعداد 8 ملین ہے جس میں سے 34 ہزار سات سو بیالیس افراد کو کورونا ویکسین لگائی گئی ہے۔رجسٹرڈ ہیلتھ کیئر ورکرز کی تعداد 2 لاکھ 32 ہزار 2 سو ننانوے ہے جس میں سے ایک لاکھ چھیاسی ہزار 9 سو 65 ہیلتھ کیئر ورکرز کو کورورنا ویکسین لگائی جا چکی ہے۔1600 ایسے بزرگ افراد کی ویکسینیشن کی گئی ہے جو ویکسینیشن سنٹرز نہیں آسکتے تھے۔پنجاب حکومت ایک ہفتہ میں تمام فرنٹ لائن ہیلتھ کیئر ورکرز کی ویکسینیشن کا عمل مکمل کر لے گی۔
پنجاب حکومت کے پاس ویکسین وافر مقدار میں موجود ہے اور ہم صوبے کے عوام کی خدمت میں تمام صوبوں پر بازی لے گئے ہیں ۔پنجاب حکومت کورونا کی روک تھام اور عوام کے تحفظ کیلئے بھرپور اقدامات کر رہی ہے۔ انہوں نے کہا کہ حکومت پنجاب ڈیڑھ ارب روپے سے عوام کیلئے ویکسی نیشن خرید نے جارہی ہے یہ ویکسی نیشن میڈیا, فرنٹ لائن ورکرز اور عوام کیلئے یہ ویکسی نیشن دستیاب ہوگی۔انہوں نے کہا کہ پنجاب بھر میں قانوگوئی کی سطح پر اراضی ریکارڈ سنٹر بنارہی ہے۔پٹواریوں کی خالی آسامیوں کو پر کرنے جارہے ہیں اورنادراکے اندر بھی یہ سہولت فراہم کرنے جارہے ہیںانہوں نے کہا کہ قانون کی بالادستی کو یقینی بنائیں گے۔
انہوں نے کہا کہ عوام کو پٹواری کلچرل سے نجات دلوائیں گے اورعوام کو بہتر نیا ریونیو نظام تحفے میں دیں گے۔ انہوں نے کہا کہ عثمان بزدار نے جمعہ کے دن وزیر اعظم کے ساتھ مری میں قائم ریسٹ ہاؤس کو قومی منافع دینے کیلئے عوام کیلئے مختص کیاہے,مری میں ہسپتال اور یونیورسٹی کے قیام اور سیاحت کے منصوبوں کا افتتاح کیا ہے ۔انہوں نے کہا کہ وزیر اعظم کل ملتان کے اندر جنوبی پنجاب سیکرٹریٹ کا سنگ بنیاد رکھنے جارہے ہیں یہ سیکرٹریٹ جنوبی پنجاب صوبے کی جانب ایک قدم ہے اورجنوبی پنجاب کی عوام کے ساتھ وعدہ کی تکمیل ہے ۔ڈی جی خان, ملتان اور بہاولپور ڈویژن کا حق ان کی دہلیز پر فراہم کرنے جارہے ہیں۔
ڈاکٹر فردوس عاشق اعوان نے کہا کہ جعلی راجکماری کی چیخیں بلند ہورہی ہیں ان کا کراچی کا دورہ منسوخ ہوا کاش کورونا کا احساس اس وقت بھی ہوتا جب لانگ مارچ کیلئے جلسے جلوس کئے جارہے تھے۔اس وقت کراچی کی عوام مگرمچھ کے آنسو بہانے والوں کو سمندر میں غرق کرنے کیلئے تیار ہیں۔ اپنی سیاست کو بچانے کیلئے گڑھی خدا بخش میں ٹکریں مارنے والی مریم کو اندازہ ہوگیا ہے کہ سندھ میں پی پی کے بیانیہ کاجنازہ نکل چکا ہے جس کو یہ کندھا دینے جارہی ہے۔
انہوں نے کہا کہ اپوزیشن کا کام عوام کو گمراہ کرنا نہیں اس مشکل لمحے میں عوام کے ساتھ کھڑی ہونا ہوگا۔قومی یکجہتی سے اس وائرس کا مقابلہ کرینگےکورونا سے بچاؤ کا واحد احتیاط ہے۔انہوں نے کہاکہ سیالکوٹ میں 43ہزار لوگوں کو کورونا کی ویکسی نیشن لگائی جاچکی ہے,سیالکوٹ میں الارمنگ صورتحال ہے عوام سے اپیل ہے کہ وہ بھارت میں کورونا کی تباہ کاریوں سے سبق سیکھے ۔
ڈاکٹر فردوس عاشق اعوان نے کہا کہ رمضان کے اس ہفتے میں مہنگائی میں کمی دیکھنے میں آئی ہے ,وفاقی اور صوبائی حکومت ملکر عوام کے دکھوں کو باٹنے میں مصروف عمل ہیں ۔پناہ گاہیں, لنگر خانے اور فری افطار کا سلسلہ جاری ہے,مشکل کی گھڑی میں ایک قوم بن کر لڑنا ہے,بلاول سمیت تمام سیاستدان چند ہفتوں کیلئے بھول کر تمام توانائیاں عوام کو کورونا سے بچانے کیلئے صرف کریں, اس وقت سیاست کی بچانے کی بجائے عوام کو بچائیں،قومیں بغیر سیاسی تفریق سے مشکل حالات کاملکر سامنا کرتیں ہیں۔جب بھی قوم پر برا وقت آیا ہے قوم نے ملکر جنگ لڑی ہے انتظامیہ کورونا ایس او پیز پر عملدرآمد کروانے کی پابند ہے.
وفاقی اور صوبائی حکومت کا کورونا پر زیرہ ٹالرننس ہے۔افراد کی غفلت اور لاپروائی سے کورونا پھیل ہے کوروناکے سدباب کیلئے فوج کو مدد کیلئے طلب کیا گیاہے۔قانون سب کیلئے یکساں ہے , ایکس ملز پرائس فکس کرکے چینی کی فراہمی کو یقینی بنانے کیلئے بھر پور کوشش کی جارہی ہے۔حکومت مستحق اور حقدار صارفین کوچینی 65روپے فی کلوگرام رعائتی داموں فراہم کررہی ہے۔ذخیرہ اندوزوں پر گہری نظر ہے۔حکومت منافع خوروں اورذخیرہ اندوزوں کے گلے میں قانون کا شکنجہ تنگ کیا جارہاہے۔
