اسلام آباد۔2ستمبر (اے پی پی):وزیر اعظم کی معاون خصوصی برائے خفیف غربت سینیٹر ڈاکٹر ثانیہ نشتر نے کہا ہے کہ احساس ملک بھر میں ضرورت کے مطابق میرٹ پر مبنی احساس انڈر گریجویٹ اسکالرشپ پروگرام چلا رہا ہے ، احساس اسکالرشپس ، پیشہ ورانہ ملازمت کی مارکیٹ میں زیادہ خواتین کومواقع فراہم کرے گی۔ ان خیالات کا اظہار انہو ں نے ایچ ای سی-یو ایس ایڈ اسکالرشپ ایونٹ میں بطور مہمان خصوصی خطاب کرتے ہوئے کیا۔
تقریب کی مشترکہ میزبانی ہائیر ایجوکیشن کمیشن (ایچ ای سی) اور یو ایس ایجنسی برائے بین الاقوامی ترقی (یو ایس ایڈ) نے کی جس کا انعقاد ایچ ای سی سیکرٹریٹ میں کیا گیا۔ میرٹ اور ضرورت پر مبنی سکالرشپ پروگرام (ایم این بی ایس پی ) کے تحت یو ایس ایڈ اور ایچ ای سی نے خواتین کے لیے 700 نئے گریجویٹ لیول کے وظائف ، مالی طور پر پسماندہ لڑکیوں کے لئے ٹیلنٹ ہنٹ پروگرام اور چالیس پاکستانی پبلک سیکٹر یونیورسٹیاں کے مالی امداد کے نظام کو سپورٹ کرنے کے لئے صلاحیت بڑھانے کا منصوبہ شروع کیا ہے۔
اس موقع پر خطاب کرتے ہوئے ڈاکٹر ثانیہ نشتر نے یو ایس ایڈ کا شکریہ ادا کیا کہ جس نے 700 وظائف کی حمایت کی اور پاکستان میں لڑکیوں کے لئے اعلیٰ تعلیم کو فروغ دینے کے لیے خواتین یونیورسٹیوں میں صلاحیت بڑھانے میں مدد کی۔ ایک ملک اس وقت ترقی نہیں کر سکتا جب تک اس کی نصف آبادی تعلیم یافتہ نہ ہو اور اپنی صلاحیتوں کو پورا کرنے کے قابل نہ ہو۔ لہٰذا ، احساس کا مقصد پاکستان میں 10 ملین غریب خواتین کو بااختیار بنانا اور ان کی صلاحیتوں کو حاصل کرنے میں ان کی مدد کرنا ہے۔
پسماندہ آبادیوں کو تعلیم تک مالی رسائی فراہم کرنے کے لیے ، احساس ملک بھر میں ضرورت کے مطابق میرٹ پر مبنی احساس انڈر گریجویٹ اسکالرشپ پروگرام چلا رہا ہے جس میں 4 سالوں کیلئے 24 ارب روپے مالیت کی 200،000 اسکالرشپ کی پیشکش کی جا رہی ہے۔اب تک ، دو سالوں میں 142،000 سے زائد اسکالرشپس احساس کے تحت دی گئی ہیں۔ احساس سکالرشپ اپنا 50 فیصد کوٹہ خواتین کے لیے محفوظ رکھتی ہے۔ ٹیوشن فیس کا 100 فیصد پورا کرکے اور ضروری رہائشی اخراجات کے لیے اضافی وظیفہ فراہم کرتے ہوئے ، احساس تمام طلباء کے لیے کھیل کا میدان بھی فراہم کرتا ہے۔
ڈاکٹر ثانیہ نے مزید کہا کہ مجھے پختہ یقین ہے کہ ، احساس اسکالرشپس ، پیشہ ورانہ ملازمت کی مارکیٹ میں زیادہ خواتین کومواقع فراہم کرے گی ، رکاوٹوں کو دور کرےگی ، معاشرے اور کاروبار میں ان کی بڑھتی ہوئی شمولیت کو یقینی بنائے گی اور خواتین کی مجموعی معاشی بااختیاری میں اضافہ کرے گی۔ احساس انڈر گریجویٹ اسکالرشپ پروگرام ملک بھر میں احساس اسکول وظیفہ جات کے ساتھ ساتھ پاکستان میں پہلی بار ، پری اسکول سے انڈر گریجویٹ تک ہر عمر میں تعلیم کو بہتر بنانے کے اقدامات پر جامع نظر ڈالتا ہے۔
یو ایس ایڈ نے 2004 سے ایم این بی ایس پی پروگرام کے ذریعے ہونہار لیکن مالی طور پر پسماندہ طلباء کے لیے وظائف دیءے تاکہ ہائر ایجوکیشن کمیشن حکومت پاکستان کوپاکستانی یونیورسٹیوں میں داخلہ بڑھانے اور بین الاقوامی معیار پر پورا اترنے کی کوششوں میں مدد ملے۔USAID مشن ڈائریکٹر/پاکستان جولی کوینن نے کہا ، "ہمیں HEC کے ساتھ شراکت داری میں یہ بتاتے ہوئے خوشی ہو رہی ہے کہ ہم خواتین کی تعلیم کے لیے زیادہ پرعزم ہیں۔ 700 مکمل طور پر فنڈڈ گریجویٹ لیول کے وظائف انتہائی باصلاحیت خواتین کو ترجیحی طور پر دیہی سندھ ، فاٹا ، جنوبی پنجاب اور خیبر پختونخوا کے تنازعات سے متاثرہ اضلاع کو نوازے جائیں گے۔
انہوں نے مزید کہا کہ ڈونرز اور شراکت داروں کی مدد کرنا یو ایس ایڈ کے اہم ایجنڈوں میں سے ایک ہے۔ "خدمات کی بہتر ترسیل اور نظام کی شفافیت کے لیے ، ہم احساس انڈر گریجویٹ اسکالرشپس کے 40 شراکت داروں کے مالی امداد کے دفاتر کے یونیورسٹی ایڈمنسٹریٹرز کی صلاحیتوں کو بڑھانے میں سرمایہ کاری کر کے بہت خوش ہیں۔مائیکل نہر باس ، ڈپٹی مشن ڈائریکٹر یو ایس ایڈ پاکستان نے کہا کہ ایم این بی ایس پی وقت سے پہلے خواتین طالب علموں کی شناخت اور ان میں سرمایہ کاری کرنے میں مدد کرے گی تاکہ سکالرشپ کے دستیاب مواقع کے لیے درخواست دینے کی حوصلہ افزائی کی جا سکے اور انہیں یونیورسٹیوں کے انٹری ٹیسٹ میں کامیاب ہونے کی تربیت بھی دی جا سکے۔
ایگزیکٹو ڈائریکٹر ایچ ای سی شائستہ سہیل نے ایم این بی ایس پی کے تحت توسیعی پروگرام شروع کرنے پر مشن ڈائریکٹر یو ایس ایڈ کا شکریہ ادا کیا اور تسلیم کیا کہ خواتین کی تعلیم اور ٹیلنٹ ہنٹ پروگرام میں کی جانے والی سرمایہ کاری لڑکیوں کو بااختیار بنانے اور اعلیٰ تعلیم کی طرف خواتین کی رسائی بڑھانے کے لیے اہم اقدامات ہیں ، جو کہ ایچ ای سی کا ایک اہم مقصد ہے۔تقریب میں موجود دیگر معزز مہمانوں میں یو ایس ایڈ مشن ڈائریکٹر پاکستان ، ایگزیکٹو ڈائریکٹر ایچ ای سی ، یو ایس ایڈ کے عہدیدار ، وائس چانسلر اور طلباء شامل تھے۔
ایچ ای سی ، وائس چانسلرز اور طلباء نے پلیٹ فارم ایم این بی ایس پی سے خواتین کی تعلیم میں سرمایہ کاری کے لیے یو ایس ایڈ کی زبردست شراکت کی کوششوں کو سراہا۔پاکستان کی مختلف یونیورسٹیوں کے وائس چانسلرز نے تعلیم کے شعبے میں یو ایس ایڈ اور ایچ ای سی کی شراکت کو سراہا ، طلباء کو ان کی زندگی بدلنے کا موقع فراہم کیا ، کیونکہ ان میں سے اکثر پاکستان کے مختلف شعبوں میں اپنا حصہ ڈال رہے ہیں۔
