ملتان۔21مارچ (اے پی پی):معاون خصوصی وزیراعظم برائے سماجی تحفظ اور تخفیف غربت سینیٹر ڈاکٹر ثانیہ نشترنے کہا ہے کہ احساس ادائیگی آپریشن کے مجموعی معیار کو بہتر بنانے کے لیے اور کوآرڈینیشن کو مضبوط بنانے کے لیے مشترکہ اقدامات کیے جا رہے ہیں۔ان خیالات کااظہار انہوں نے جنوبی پنجاب سیکرٹریٹ میں ایڈیشنل چیف سیکرٹری ثاقب ظفر کے ہمراہ اجلاس کی صدارت کرتے ہوئے کیا۔ اجلاس میں جنوبی پنجاب بھر سے ضلعی انتظامیہ، قانون اور نافذ کرنے والے اداروں، شراکت دار بینک اور احساس کے علاقائی افسران سمیت مختلف محکموں کے افسران نے شرکت کی۔
اجلاس کا مقصد فیلڈ میں احساس کفالت کی ادائیگیوں کے معیار کو بہتر بنانے کے لیے مربوط اقدامات پر تبادلہ خیال کرنا تھا۔اجلاس میں اس بات پر بھی اتفاق کیا گیا کہ جنوبی پنجاب کے تمام 11 اضلاع میں احساس کی ادائیگیوں کی سہولت کے لیے مزید 20 ادائیگی کیمپس کا انعقاد کیا جائے گا۔
ڈاکٹر ثانیہ نشترمزید کہاکہ آج کی اسٹیک ہولڈر میٹنگ نے ہمیں جنوبی پنجاب میں احساس کی ادائیگیوں کو بہتر بنانے کے بارے میں گہری بصیرت فراہم کی ہے۔ ہم نے اشتراکی اقدامات پر تبادلہ خیال کیا ہے کہ کس طرح احساس کی ادائیگی کے آپریشنز کے مجموعی معیار کو بہتر بنانے کے لیے ہم آہنگی کو مضبوط کیا جائے۔
انہوں نے مزید کہاکہ احساس کفالت کے چھ ماہ کے وظیفہ کی رقم اب12ہزار روپے بڑھا کر 14ہزار فی گھرانہ کر دی گئی ہے۔ڈاکٹرثانیہ نشترنے کہاکہ احساس کفالت صارفین کے بچوں کے احساس تعلیمی وظائف بھی جاری ہو رہے ہیں۔انہوں نے کہاکہ احساس پروگرام کے حکام جعلی کٹوتیوں سے سختی سے نمٹنے کے لیے مربوط کارروائیاں بھی کر رہے ہیں جن میں سے زیادہ تر کا تعلق جنوبی پنجاب اور سندھ سے ہے۔
جنوبی پنجاب کے ملتان، ڈیرہ غازی خان اور بہاولپور ڈویژن کے کمشنرز، ڈپٹی کمشنرز، ریجنل پولیس افسران، ڈسٹرکٹ پولیس آفرز اور ایف آئی اے کے سینئر افسران اور اینٹی کرپشن اسٹیبلشمنٹ نے احساس کی تقسیم کے آپریشنز کو بہتر بنانے کے لیے مکمل تعاون کی یقین دہانی کرائی۔ڈاکٹر ثانیہ نے جنوبی پنجاب کی 42 تحصیلوں میں احساس کی تقسیم کی کارروائیوں کو انجام دینے میں مسلسل تعاون پر ضلعی انتظامیہ اور قانون اور نافذ کرنے والے اداروں کا شکریہ ادا کیا۔
ڈاکٹر ثانیہ نے بتایا کہ اب تک جنوبی پنجاب میں احساس کفالت کے کل 1.3 ملین مستحقین میں سے 66 فیصد کو جنوری سے جون 2022 کی ادائیگیاں کی جا چکی ہیں۔ اس کے علاوہ، خطے میں احساس سکول کے وظیفہ کے لیے 2.1 ملین بچوں کو رجسٹر کیا گیا ہے۔
