اسلام آباد۔5دسمبر (اے پی پی):پاکستان شوبز انڈسٹری کی معروف اداکارہ یمنیٰ زیدی کی پہلی فلم ’’نایاب نام یاد رکھنا‘‘ کا پوسٹر جاری کر دیا گیا۔فوٹو اینڈ ویڈیو شیئرنگ پلیٹ فارم انسٹاگرام پر اداکارہ نے پوسٹ شیئر کرتے ہوئے اپنی آنے والی فلم کا باضابطہ اعلان کیا ہے۔
یمنیٰ نے فلم کا آفیشل پوسٹر شیئر کرتے ہوئے خوشی کا اظہار کیا اور لکھا کہ آئیے چلتے ہیں ہم اپنے پہلے آفیشل پوسٹر کے ساتھ نایاب کی دنیا میں قدم رکھتے ہیں، اسی جوش و جذبے کے ساتھ جو ہمارے مرکزی کردار میں نظر آرہا ہے۔انہوں نے فلم کا خلاصہ بیان کرتے ہوئے مزید لکھا کہ اس دنیا کی افراتفری میں خوابوں کو حاصل کرنے کی خواہش و دوڑ میں ہمارے ساتھ شامل ہو جائیں، ایک پرجوش اور زندگی کے اتار چڑھاؤ سے بھرپور کہانی کے لیے تیار رہیں۔
عمیر نثار علی کی ہدایت کاری میں بننے والی فلم ’’نایاب نام یاد رکھنا ‘‘سے یمنیٰ زیدی پہلی بار بڑے پردے پر جلوہ گر ہونے والی ہیں، اداکارہ فلم میں ایک کرکٹر کا کردار نبھا رہی ہیں۔یہ فلم رومینہ عمیر اور عمیر عرفانی کی پیشکش ہے۔
Short Link: https://urdu.app.com.pk/urdu/?p=416812
