لاہور۔20جولائی (اے پی پی):صوبائی وزیر داخلہ عطا اللہ تارڑ نے تحریک انصاف کے لیاقت پور سے رکن پنجاب اسمبلی چوہدری مسعود کا استعفیٰ میڈیا میں پیش کرتے ہوئے کہا ہے کہ فواد چوہدری جس رکن اسمبلی کو 40کروڑ روپے دینے کی پیشکش کا الزام عائد کر رہے ہیں، وہ 3اپریل کو اپنا استعفی پیش کر چکے ہیں ،اراکین اسمبلی کو پیسوں کی پیشکش کرنے کے الزامات کو مسترد کرتے ہیں ،
پرویز الٰہی اور ان کے صاحبزاد ے نے حج کے فریضے کیلئے موجود ہمارے رکن اسمبلی مولانا الیاس چنیوٹی کو اپنے کسی جاننے والے کے ذریعے10کروڑ روپے رشوت کی پیشکش کی،فیصل آباد سے ہماری رکن اسمبلی کو بھی رشوت دینے کے لئے بیگز بھجوائے گئے لیکن ان کے داماد نے گھر سے نکال دیا ، پی ٹی آئی کے استعفوں کا سلسلہ شروع ہو گیا ہے ،مزید بھی آگاہ رکھیں گے، سیاست ممکنات کا کھیل ہے ، ممکنات لا محدود اور سرپرائز آ سکتے ہیں ،
پی ٹی آئی کے بہت سارے لوگ پرویزالٰہی کو ووٹ دینے کے لئے تیار نہیں، مسلم لیگ (ن) کے مرکزی سیکرٹریٹ ماڈل ٹائون میں پریس کانفرنس کرتے ہوئے عطا ءاللہ تارڑ نے کہا کہ وزیر اعلیٰ کے انتخاب میں دو روز باقی ہیں اورحسب روایت تحریک انصاف والوں نے رونا شروع کر دیاہے ، رونے کی وجہ یہ ہے کہ انہیں یقین نہیں بقول عمران خان کے وہ پنجاب کے سب سے بڑے ڈاکو کو بطور وزیر اعلیٰ نامزد کئے بیٹھے ہیں،یہ عمران خان کا ایسا یوٹرن ہے جس کے لئے اپنی جماعت کے بہت سارے اراکین ووٹ دینے کو تیار نہیں ہیں ،ان کی پارلیمانی پارٹی کا اجلاس ہوا جس میں شاہ محمو دقریشی اور پرویز الہٰی موجود تھے ،
اجلاس میں188میں سے 100اراکین نے شرکت کی ،ا گر انتخاب سے دو روز پہلے آپ کے حالات یہ ہیں کہ 188کی اپنی تعداد پوری نہیں کرسکے تو انتخاب والے دن آپ کیا کریں گے، انہوں نے کہا کہ ابن الوقت آدمی جس کا نام فواد چوہدری ہے چیخیں مارہا ہے کہ عطا ءاللہ تارڑ کو گرفتار کر و پتہ نہیں وہ کس سے کہہ رہا ہے مگر اس کی چیخ و پکار سنائی دے رہی ہے ،میں لاہور میں موجود ہوں اور ان شا اللہ ادھر ہی رہوں گا، یہ گرفتاری کی جو آوازیں لگا رہے ہیں وہ کہیں او رجا کر لگائیں ،
آپ کامعلوم نہیں آپ نے اگلا الیکشن کس کی ٹکٹ پر لڑنا ہے ، ہر لیڈر کو اپنا باپ کہنے والا شخص پانچ سیاسی جماعتیں بدل چکا ہے ،آپ نے 2018 میں مسلم لیگ (ن)کی ٹکٹ بھی منت سماجت کرکے لی ، یہی فواد چوہدری یوتھیا کے لفظ اورغلیظ گالیاں سوشل میڈیا پر پی ٹی آئی کو دیتے تھے ، ان کی ہمت ہے کہ اسی پارٹی میں بیٹھ کر ہمیں للکارتے ہیں ، آپ رونا بند کر دیں یہ وہ دور نہیں جب آپ اپنے چچا کے نام کی رشوت اٹھائیں گے اورایک ہی کیس دونوں پارٹیوں سے پیسے اٹھا کر حق میں فیصلہ ہو جائے گا تو اس کا پیسہ رکھ لیں گے اور جو ہار جائے گا اس کا پیسہ واپس کر دیں گے ،
آپ کی پرورش اور آپ نے جو ایک ایک پائی کمائی ہے اس میں حلال کا ایک زرہ نہیں ہے ،جو فرسٹ لا کمپنی کیسے بنی اس میں کون کیسز لے کر آتا تھا کیسے کیسز کا فیصلہ ہوتا تھا سب کو معلوم ہے، آپ الزام لگارہے ہیں کہ میں نے ایک رکن اسمبلی کو چالیس کروڑ روپے کی پیشکش کی ، میں اللہ کو حاضر ناظر جان کر کہتا ہوں جن کا نام چوہدری مسعود ہے اگر میں نے ان کو پیشکش کی ہو تو اللہ مجھ پر عذاب اور قہر نازل کرے اور اگر آپ جھوٹے ہیں تو میں یہ بھی دعا کرتا ہوں اللہ آپ پر قہر اورعذاب نازل فرمائے ،یہ کہا گیا کہ لیاقت پور سے رکن اسمبلی کو پیسوں کی پیشکش کی گئی ان کو پیسے دئیے گئے ،
عطا اللہ تارڑ نے مذکورہ رکن اسمبلی کا استعفیٰ میڈیا کو دکھاتے ہوئے کہا کہ یہ انکا استعفی ہے ، پی ٹی آئی کے لیاقت پور سے رکن اسمبلی کا استعفی آج کا نہیں یہ تین اپریل 2022 کا ہے جو انہوں نے پارٹی سے نالاں ہو کر دیا اور اس کے متن میں لکھا کہ تحریک انصاف میں کوئی انصاف نہیں ،وہ با عزت او ربا وقار شخص ہیں اور اپنا استعفی جمع کر اچکے ہیں،آپ رشوت کا الزام لگارہے ہیں ، میں قرآن پر حلف دینے کو تیار ہوں انہیں کوئی پیسے نہیں دئیے گئے ، فواد چوہدری آپ اگر پیسے دینے کے بارے میں قرآن پر حلف دیتے ہیں میں پیچھے ہٹ کر سیاست چھوڑ دوں گا، جس پارٹی کو اپنے ایم پی اے کی خبر نہیں وہ کیسی پارلیمانی پارٹی ہے ،
آپ کو ووٹ چاہیے 188جو آپ کے پاس موجود ہیں اب اس میں ایک استعفی آ گیا ہے تو 187رہ گئے ہیں، ہمارے ووٹ180پر کھڑے ہیں اورصرف 7ووٹوں کا فرق ہے ،اگر فیصل نیازی اور جلیل شرقپوری نے استعفی نہ دیا ہوتا تو پانچ کا فرق ہوتا، ہم نے تو نہیں کہا آپ نے ہمارے مستعفی ہونے والے اراکین کو کروڑوں کی پیشکش کی ہے، واپس آئیں گے تو واپس لیں گے وہ ہماری پارلیمانی پارٹی کے ممبر ہیں ،انہوں نے کہا کہ پی ٹی آئی والوں کا رونا سمجھ میں آتا ہے اس لئے ہے کہ ایک استعفی آیا ہے اورہو سکتا ہے اس کے بعد مزید بھی آ جائیں،
انہوں نے کہا کہ مولانا الیاس چنیوٹی ہمارے رکن اسمبلی ہیں اور وہ حج کی ادائیگی کے لئے سعودی عرب میں موجود تھے ،پرویز الہٰی اور ان کے صاحبزادے نے سعودی عرب کی مقدس زمین پر حج کے فریضے کے دوران ان کے لئے ایک شخص کو دس کروڑ روپے رشوت دے کر بھیجا ،آپ کو وزیر اعلیٰ بننے کا شوق ہے آپ کا بیٹا بھی دیوانہ وار پھر رہا ہے اورپرائیویٹ جیٹ پر اسلام آباد گیا ہوا تھا اور اراکین اسمبلی کی منت ترلے کر رہا ہے ، حج پر گئے ہوئے شخص جو مقدس سر زمین پر موجود ہے اس کو رشوت دینے کی پیشکش مکرو ہ او رقبیح عمل ہے ،
انہوں نے کہا کہ چوہدری پرویز الہٰی بھی عمران خان کی طرح اندر سے کھوکھلے ہیں ، ان کے پاس سارا رشوت کا مال ہے، ہماری فیصل آباد سے ایک رکن اسمبلی جو بزرگ اور بیمار ہیں ان کے گھر میں اپنے دو عزیزوں کو رشوت کے پیسے دے کر بھیجا لیکن ان کے داماد نے گالیاں دے کر نکالا، جو لوگ گئے انہوں نے بیگ اٹھائے ہوئے تھے، چوہدری صاحب بس کر دیں، آپ کے بندے استعفوں پر آ گئے ہیں اور آپ کاحرام کا پیسہ لینے کو تیار نہیں ہے ،آپ کتنا آگے جائیں گے،
انہوں نے کہا کہ عدالت میں درخواستیں دے رہے ہیں توہین عدالت ہو رہی ، جو آپ کے لوگ پیسے لے کر پھر رہے ہیں وہ توہین عدالت نہیں ، ہمارے لوگوں سے زبردستی استعفے نہیں لئے، سات کی گنتی باقی ہے میدان بھی ہے اور گھوڑا بھی ، ہم پر امید او رپر عزم ہیں، ہم سنجیدگی سے میدان میں اتر پڑے ہیں،ہار جیت اللہ کے ہاتھ میں ہے لیکن ہم زور پورا لگائیں گے ، اللہ ہمیں فتح نصیب کرے ،انہوں نے کہا کہ ہم بھی عدالت میں بتائیں گے کہاں کہاں پیسوں کی آفر کی اور کیسے کی گئی، پی ٹی آئی کے استعفوں کاسلسلہ شروع ہو گیا ،میڈیا کو مزید بھی آگاہ رکھیں گے، سیاست ممکنات کا کھیل اور ممکنات لا محدود ہیں،سرپرائز آ سکتے ہیں،
انہوں نے شاہ محمود قریشی کے حوالے سے کہا کہ جو شخص عمران خان کی نا اہلی کے لئے دعائیں کرتا ہو، لوگوں سے رابطہ کرتا رہا ہو ، ایک دن وہ پیپلز پارٹی کا وزیر خارجہ ہواور اگلے روز تحریک انصاف کاوزیر خارجہ بن جائے ایسے شخص کے بارے میں کیا بات کی جائے، شاہ محمود قریشی کا مقام پیپلز پارٹی کی وجہ سے لیکن جو اپنے محسنوں کو بھول جائے تو اس کا کوئی علاج نہیں،
انہوں نے کہا کہ ہم پر امن لوگ ہیں ہم نے کبھی امن خراب کیا نہ ارادہ رکھتے ہیں،انہوں نے کہا کہ شہباز گل کے حوالات میں آنسو جاری ہوگئے اورترلے منتیں کرتا رہا کہ میری ضمانت کرائو ،میں بیمار آدمی ہوں، انہوں نے کہا کہ ہمارے سب سے رابطے ہیں ۔
