عمان ۔ 26 جولائی (اے پی پی) اردن میں ساحلی شہر اقابہ کے قریب زیرسمندر ایک عجائب گھر کا افتتاح کردیا گیا ہے ۔ اس سلسلہ میں ایک تقریب میں کئی ٹینکوں، فوجی ٹرکوں اور ایک ہیلی کاپٹر کو سمندر میں اتارا گیا۔ اِس فوجی ساز و سامان کو بحیرہ احمر میں کورل ریف کے ساتھ اِس طرح رکھا گیا ہے کہ جیسے یہ کسی میدانِ جنگ میں ہوں۔ مقامی حکام کا کہنا ہے کہ یہ نمائش سیاحوں کے لئے ایک مختلف طرح تجربہ ہے ۔ اقابہ سپیشل اکنامک زون اتھارٹی کے مطابق یہ عجائب گھر کھیل، ماحولیات اور کئی شعبوں کا اشتراک ہے۔اردن کی شاہی ایئر فورس کی جانب سے عجائب گھر کے لیے ایک ہیلی کاپٹر کا عطیہ دیا گیا۔اقابہ سپیشل اکنامک زون اتھارٹی کے مطابق فوجی گاڑیوں اور ٹینکوں سے تمام خطرناک مواد نکال لیا گیا ہے۔اِس عجائب گھر میں غوطہ خور، سکوبہ ڈائیور اور ایسے سیاح جا سکیں گے جو شیشے کے فرش والی کشتیاں استعمال کرتے ہیں۔
