اسلام آباد۔21مئی (اے پی پی):اردن کے سفیر ڈاکٹر معین خراست نے کہا ہے کہ اردن پاکستان کے ساتھ تجارتی تعلقات کو مزید فروغ دینے کا خواہاں ہے ، اردن پاکستان کے ساتھ اپنے تاریخی اور دوستانہ تعلقات کو قدر کی نگاہ سے دیکھتا ہے۔ان خیالات کا اظہار انہوں نے گزشتہ روز راولپنڈی چیمبر آف کامرس اینڈ انڈسٹری کے دورے کے موقع پر کیا ۔
ترجمان نے بتایاکہ اردن کے سفیر نے آر سی سی آئی کے صدر ثاقب رفیق سے ملاقات بھی کی۔ ملاقات میں سینئر نائب صدر محمد حمزہ سروش، سابق صدر ملک شاہد سلیم، ایگزیکٹو کمیٹی کے رکن ملک مدثر مقبول اور چوہدری محمداکرم بھی موجود تھے۔ملاقات کے دوران پاکستان اور اردن کے درمیان دوطرفہ تجارتی اور اقتصادی تعلقات کو مزید فروغ دینے کے وسیع شعبوں پر بھی تبادلہ خیال کیا گیا۔سفیر معین خراست نے کہا کہ ان کا ملک سیاحت، زراعت، ہیلتھ اور سروسز سمیت مختلف شعبوں میں دوطرفہ تعاون بڑھانے کے ذریعے پاکستان کے ساتھ اپنے تجارتی تعلقات کو وسعت دینے کا خواہاں ہے۔اس موقع پر صدر چیمبر ثاقب رفیق نے سفیر کو چیمبر کی سرگرمیوں پر ایک ڈاکومینٹری بھی دکھائی۔ صدرثاقب رفیق نے دونوں ممالک کے درمیان تعلقات کو مضبوط بنانے کے لئے بزنس فورمز، تجارتی وفود اور ثقافتی تبادلے کے پروگراموں کے انعقاد میں مدد کے لئے چیمبر کی جانب سے بھرپور تعاون کا یقین دلایا۔
انہوں نے اس بات کا اعادہ کیا کہ راولپنڈی چیمبرپاکستان اور اردن کے درمیان خوشحال شراکت داری کو یقینی بناتے ہوئے باہمی ترقی اور ترقی کے اقدامات کی حمایت کے لئے انتھک محنت کرے گا۔ اس موقع پر دو طرفہ تجارت کو مضبوط بنانے، اقتصادی شراکت داری، سیاحت کے فروغ، سرمایہ کاری کے مواقع، نیٹ ورکنگ اور تعاون اور تعلیمی تعاون سے متعلق امور پر تبادلہ خیال کیا گیا۔ آخر میں صدر ثاقب رفیق نے معین خراست کو دورہ چیمبر پر یادگاری شیلڈ بھی پیش کی۔
