راولپنڈی۔ 27 جون (اے پی پی):ازبکستان کے ایک اعلیٰ سطحی تجارتی وفد نے سفیر علی شیر تخطایف کی قیادت میں راولپنڈی چیمبر آف کامرس اینڈ انڈسٹری کا دورہ کیا۔ دورے کا مقصد ٹیکسٹائل، چمڑے، زراعت، ماہی گیری، کھاد اور تجارت سمیت مختلف شعبوں میں سرمایہ کاری اور تجارتی مواقع تلاش کرنا تھا۔ ازبک سفیر نے پاکستانی کاروباری طبقے کو ازبکستان کی ابھرتی ہوئی منڈیوں اور سرمایہ کاری دوست ماحول سے فائدہ اٹھانے کی دعوت دی۔ وفد میں ازبک چیمبر آف کامرس، ازبک ٹیکسٹائل و لیدر ایسوسی ایشنز اور دیگر نمایاں نجی اداروں کے نمائندگان شامل تھے۔ سفیر علی شیر تخطایف نے ازبک معیشت پر جامع روشنی ڈالتے ہوئے توانائی اور کیمیکل انڈسٹری میں سرمایہ کاری کے مواقع اجاگر کیے۔
اس موقع پر بی ٹو بی میٹنگز بھی منعقد کی گئیں جن کا مقصد پاکستان اور ازبکستان کے درمیان اقتصادی تعاون کو مضبوط بنانا اور شراکت داری کے نئے مواقع پیدا کرنا تھا۔
