اسرائیل، لبنان اور شام کو غیرمستحکم کرنے کی کوشش کر رہا ہے، سیکرٹری جنرل عرب لیگ

ریاض۔5اپریل (اے پی پی):عرب لیگ کے سیکرٹری جنرل احمد ابو الغیط نے کہا ہے کہ اسرائیل بین الاقوامی اصولوں کی صریح خلاف ورزی کرتے ہوئے غیر ذمہ دارانہ عسکری اشتعال انگیزی سے شام اور لبنان کو غیرمستحکم کرنے کی کوشش کر رہا ہے۔اردو نیوز کے مطابق جاری بیان میں سیکرٹری جنرل احمد ابو الغیط نے افسوس کا اظہار کرتے ہوئے کہا کہ عالمی برادری کی بے عملی سے صیہونی ریاست کی مزید حوصلہ افزائی ہوئی ہے۔

انہوں نے کہا کہ اسرائیل کی جانب سے فلسطینی سرزمین، لبنان اور شام کے خلاف شروع کی گئی جنگ لاپرواہی کے نئے دور میں داخل ہو گئی ہے، دستخط شدہ معاہدوں کی جان بوجھ کر خلاف ورزی کی جا رہی ہے، ملکوں پر قبضے کیے جا رہے ہیں اور مزید شہریوں کو مارا جا رہا ہے۔انہوں نے کہا کہ لبنان میں ٹارگٹ کلنگ کا دوبارہ آغاز ناقابل قبول ہے اور یہ جنگ بندی معاہدے کی خلاف ورزی ہے جو لبنان کے ساتھ گزشتہ سال طے پایا تھا۔

انہوں نے کہا کہ اسرائیلی کارروائیاں ملک کے اندرونی ایجنڈا پر مبنی ہیں اور اس کی وجہ سے شہریوں کی زندگیاں اور علاقائی امن داؤ پر لگاہوا ہے۔ اسرائیل کی حزب اللہ سے جاری جنگ کے نتیجے میں اکتوبر 2023 سے نومبر 2024 کے درمیان لبنان میں 3 لاکھ 961 افراد شہید اور 16 ہزار 520 زخمی ہو چکے ہیں۔شام کی نئی حکومت نے 3 اپریل کو جنوبی صوبے درعا میں ایک ہوائی اڈے سمیت فوجی اہداف پر حملوں کی لہر اور زمینی مداخلت کے نتیجے میں 13 افراد کی شہادت کے بعد اسرائیل پر عدم استحکام کی مہم چلانے کا الزام لگایا ہے۔

Short Link: https://urdu.app.com.pk/urdu/?p=578623