روم۔15مارچ (اے پی پی):اٹلی نے کہا ہے کہ اس نے 7اکتوبر کے بعد اسرائیل کو ہتھیار فراہم نہیں کئے۔ روسی خبر رساں ادارے تاس کے مطابق اطالوی وزیر دفاع گویڈو کروسیٹو نے گزشتہ روز پارلیمنٹ میں کہا کہ 7 اکتوبر کے بعدمتعلقہ ادارے کی جانب سے اسرائیل کو ہتھیاروں کی منتقلی کے لیے کوئی نئی اجازت نہیں ملی، جس کی وجہ سے اسرائیل کو ہتھیاروں کی فراہمی روک دی گئی۔ جو لائسنس 7 اکتوبر سے پہلے دیئے گئے تھے ان پر پہلے ہی عملدرآمد کیا گیا تھا۔
انہوں نے یہ بھی کہا کہ ہتھیاروں کی جن کھیپوں کی اجازت دی گئی تھی لیکن مذکورہ تاریخ سے پہلے ان پر عمل درآمد نہیں کیا گیا تھا، ان کا دوبارہ جائزہ لیا گیا تاکہ یہ یقینی بنایا جا سکے کہ فہرست میں ایسا مواد تو موجود نہیں ہے جو اگر استعمال کیا جائے تو غزہ کے باشندوں کو متاثر کر سکتا ہے۔
