تل ابیب ۔22اپریل (اے پی پی):اسرائیل نے غزہ کی پٹی کے مختلف علاقوں پر فضائی حملے کیے جن میں سات افراد شہید ہو گئے۔العربیہ اردو کے مطابق غزہ کی پٹی میں محکمہ شہری دفاع کے ترجمان محمود بصل نے بتایا کہ اسرائیلی فوج نےمنگل کی صبح غزہ شہر کے علاوہ بیت لاہیا، بیت حانون اور خان یونس کو شدید فضائی حملوں کا نشانہ بنایا۔
انہوں نے کہا کہ اسرائیلی فوج نے غزہ کے مشرقی حصے اور رفح میں دس سے زیادہ گھروں کو دھماکوں سے اڑا دیا۔ دوسری جانب غزہ کی پٹی کے شمال میں واقع جبالیہ میں فضائی حملے کے نتیجے میں بلدیہ کے زیر انتظام بلڈوزر اور دیگر ساز و سامان جل کر تباہ ہو گیا۔اسی طرح غزہ شہر میں الدرج، الشجاعیہ اور التفاح کے علاقوں پر اسرائیلی توپوں نے گولہ باری کی۔یاد رہے کہ دو ماہ تک جاری رہنے والی جنگ بندی کے بعد گزشتہ ماہ 18 مارچ کو اسرائیل نے غزہ کی پٹی پر دوبارہ سے حملے شروع کر دیے۔
اسرائیل کا موقف ہے کہ غزہ کی پٹی میں یرغمال قیدیوں کی رہائی یقینی بنانے کے لیے فوجی دباؤ ضروری ہے۔ غزہ میں وزارت صحت کی طرف سے جاری اعداد و شمار کے مطابق اسرائیلی حملوں کا سلسلہ دوبارہ شروع ہونے کے بعد سے اب تک غزہ کی پٹی میں1827 افراد شہید ہو چکے ہیں۔ اسی طرح اکتوبر 2023 میں جنگ چھڑنے کے بعد سے غزہ کی پٹی میں شہادتوں کی مجموعی تعداد 51,201 تک پہنچ چکی ہے۔
Short Link: https://urdu.app.com.pk/urdu/?p=585592
