بہاولپور۔ 30 اکتوبر (اے پی پی):شعبہ جغرافیہ اسلامیہ یونیورسٹی بہاولپور کے زیر اہتمام آفات کے خطرے میں کمی کے عالمی دن کی مناسبت سے ’’آفات کے خطرات میں کمی ، کمیونٹیز کو بااختیار بنانے اور محفوظ مستقبل‘‘ کے عنوان سے سیمینار کا انعقاد کیا گیا۔ سیمینار سے معزز مہمان مقررین ساجد نور اور ڈاکٹر قرۃ العین صفدر، اسسٹنٹ پروفیسر اور شعبہ ماحولیات کے لیکچرار ڈاکٹر اویس منیر نے خطاب کیا۔ مقررین نے کہا کہ ہر سال 13 اکتوبر ڈیزاسٹر رسک ریڈکشن (IDDRR) کے عالمی دن کے طور پر منایا جاتا ہے۔
اس دن کا مقصد آفات کے خطرات کو کم کرنا ہے، اقوام متحدہ کے ذیلی ادارے یو این ڈی پی کی کوششوں کا مقصد قدرتی آفات سے نمٹنے کی تیاری کو بڑھانا، آب و ہوا کے لچکدار انفراسٹرکچر کی حمایت، کمزور کمیونٹیز کی حفاظت اور پائیدار ترقی کو فروغ دینا ہے۔قاضی خلیل الرحمان نے خطاب کرتے ہوئے شعبہ جغرافیہ میں دستیاب جدید ترین سہولیات اور وسائل کی مدد سے طلباء وطالبات کی عملی تربیت پر گفتگو کی۔ چیئرمین شعبہ جغرافیہ پروفیسر ڈاکٹر شیر محمد ملک مہمان مقررین کا شکریہ ادا کیا اور سیمینار کے انعقاد پر منتظمین کی کوششوں کو سراہا۔
Short Link: https://urdu.app.com.pk/urdu/?p=519037
