اسلام آباد۔21مارچ (اے پی پی):وزیر مملکت برائے ریلوے بلال کیانی نے قومی اسمبلی میں ایک توجہ دلائو نوٹس پر خطاب کرتے ہوئے تصدیق کی کہ مرکزی ڈائریکٹوریٹ آف نیشنل سیونگز (سی ڈی این ایس) نے نومبر 2024 میں اپنی اسلامی ونڈو آپریشنز دوبارہ شروع کر دی ہیں۔یہ نوٹس عالیہ کامران کی جانب سے اٹھایا گیا جس میں وزیر خزانہ و محصولات کی توجہ قومی بچت سکیموں کے اسلامی شریعت کے مطابق نفاذ نہ ہونے کے مسئلے کی طرف مبذول کرائی گئی۔ اس معاملے پر عوام میں شدید بے چینی پائی جا رہی تھی۔بلال اظہر کیانی نے وضاحت کی کہ سی ڈی این ایس نے اپنی اسلامی سرمایہ کاری سکیمیں جولائی 2023 میں متعارف کرائی تھیں جو کہ چار مختلف مدت کے حامل مالیاتی منصوبے تھے۔
ان میں چلتے کھاتے، ایک سال، تین سال اور پانچ سال کی ڈپازٹ سکیمیں شامل تھیں، جو مکمل طور پر اسلامی مالیاتی اصولوں کے مطابق تیار کی گئی تھیں تاہم ان سکیموں کے تحت مالیاتی سرمایہ کاری کے لیے درکار بنیادی اثاثے ختم ہونے کے باعث، ان کا آپریشن فروری 2024 میں عارضی طور پر معطل کر دیا گیا۔ جیسے ہی نئے اثاثے حاصل کیے گئے، نومبر 2024 میں یہ سکیمیں دوبارہ شروع کر دی گئیں۔انہوں نے بتایا کہ اب تک اسلامی مالیاتی مصنوعات میں سرمایہ کاری 64 ارب روپے تک پہنچ چکی ہے اور یہ سکیمیں ملک بھر میں فزیکل برانچوں کے ساتھ ساتھ ڈیجیٹل پلیٹ فارمز پر بھی دستیاب ہیں۔
وزیر مملکت نے یقین دہانی کرائی کہ جن سرمایہ کاروں نے فروری 2024 کی معطلی سے پہلے سرمایہ کاری کی تھی، انہیں منافع کی ادائیگی میں کوئی خلل پیش نہیں آیا۔ یہ عارضی معطلی صرف نئے سرمایہ کاروں کے لیے تھی جو نومبر 2024 سے دوبارہ سرمایہ کاری کر سکتے ہیں۔انہوں نے کہا کہ اسلامی مالیاتی مصنوعات کے علاوہ، سی ڈی این ایس عوام کے لیے دیگر قومی بچت سکیمیں بھی فراہم کر رہا ہے۔ حکومت ان سکیموں میں مزید بہتری لانے کے لیے پرعزم ہے تاکہ عوام کو زیادہ بہتر مالیاتی سہولیات میسر آ سکیں۔
Short Link: https://urdu.app.com.pk/urdu/?p=575219
