اسلام آباد، بالائی /وسطی پنجاب، شمال مشرقی بلوچستان اور خیبر پختونخوا میں تیز ہواؤں اور گرج چمک کے ساتھ مزید بارش ،چند مقامات پر موسلادھار بارش کا بھی امکان

اسلام آباد۔5جولائی (اے پی پی):اسلام آباد، بالائی /وسطی پنجاب، شمال مشرقی بلوچستان اور خیبر پختونخوا میں تیز ہواؤں اور گرج چمک کے ساتھ مزید بارش جبکہ چند مقامات پر موسلادھار بارش کا بھی امکان ہے۔ محکمہ موسمیات کے مطابق آئندہ 24 گھنٹوں کے دوران گلگت بلتستان اور جنوبی پنجاب میں بھی چند مقامات پر تیز ہواؤں اور گرج چمک کے ساتھ بارش کی توقع ہے۔

گذشتہ 24 گھنٹوں کے دوران خطہ پوٹھوہار، بالائی/وسطی پنجاب، شمال مشرقی بلوچستان، کشمیر، بالائی خیبر پختونخوا اورگلگت بلتستان میں تیز ہواؤں اور گرج چمک کے ساتھ بارش ہوئی جبکہ ملک کے دیگر علاقوں میں موسم گرم اور مرطوب رہا۔

اس دوران سب سے زیادہ بارش جوہرآباد میں 48، اوکاڑہ 40، سرگودہا 38، چکوال 33، فیصل آباد 25، اسلام آباد (زیروپوائنٹ 20، سید پور 14، بوکرا 2، گولڑہ، ائرپورٹ ایک)، مری 17، حافظ آباد، منگلہ 8، جھنگ 5، جہلم، کروڑ (لیہ) 4، منڈی بہاؤالدین، شیخوپورہ، ٹوبہ ٹیک سنگھ 3، اٹک، گوجرانوالہ، لاہور (ایئر پورٹ ،سٹی 2)، راولپنڈی (شمس آباد)، سیالکوٹ (ایئر پورٹ) ایک، بارکھان 34، راولاکوٹ 19، گڑھی دوپٹہ 17، مظفرآباد (ایئر پورٹ 11 ،سٹی 9) ، کوٹلی 6، بالاکوٹ 23، کاکول 7، مالم جبہ ایک، استور 3، بونجی 2 اور اسکردو میں ایک ملی میٹر بارش ر یکارڈ کی گئی۔جمعہ کو ریکارڈ کئے گئے زیادہ سے زیادہ درجہ حرارت کی رپورٹ کے مطابق نوکنڈی، دالبندین میں درجہ حرارت 48، دادو اور چلاس میں 44 ڈگری سینٹی گریڈ ریکارڈ کیا گیا۔

محکمہ موسمیات کی جانب سے جاری انتباہ کے مطابق جمعہ کو (رات) سے 7 جولائی کے دوران تیز/موسلادھار بارش سے اسلام آباد، راولپنڈی، مری، گلیات، مانسہرہ، کوہستان، ایبٹ آباد، دیر، سوات، کشمیر، شمال مشرقی بلوچستان اور ڈیرہ غازی خان کے پہاڑی ندی نالوں میں سیلابی صورتحال /طغیانی کا خطرہ جبکہ لاہور، سیالکوٹ، گوجرانوالہ، نارووال، راولپنڈی، فیصل آباد اور پشاور میں اربن فلڈنگ کا خدشہ ہے۔ شدید بارشوں کے باعث خیبر پختونخوا کے پہاڑی علاقوں، مری، گلیات، کشمیر اور گلگت بلتستان میں لینڈ سلائیڈنگ کے باعث ٹریفک کی آمدورفت متاثر ہونے کا خطرہ ہے۔

Short Link: https://urdu.app.com.pk/urdu/?p=482104