اسلام آباد۔19جولائی (اے پی پی):آئندہ 24 گھنٹوں کے دوران وفاقی دارالحکومت اسلام آباد سمیت سندھ ، جنوبی پنجاب ، کشمیر ، شمال مشرقی/جنوبی بلوچستان اور بالائی خیبر پختونخواہ میں تیز ہواؤں اور گرج چمک کے ساتھ بارش کی توقع ہے۔ اس دوران سندھ،جنوب مشرقی بلوچستان اور کشمیر میں چند مقامات پر موسلادھار بارش کا امکان ہے تاہم ملک کے دیگر علاقوں میں موسم گرم اور حبس رہے گا۔
محکمہ موسمیات کے مطابق گذشتہ 24 گھنٹوں کے دوران جنوب مشرقی سندھ اور خضدارمیں تیزہواؤں اور گرج چمک کے ساتھ بارش جبکہ سندھ میں چند مقامات پر موسلا دھار بارش بھی ہوئی تاہم ملک کے دیگر علاقوں میں موسم گرم اور مرطوب رہا۔
اس دوران سب سے زیادہ بارش بدین میں 68، تھرپارکر (نگرپارکر 12، دھلی 7، اسلام کوٹ، چھچھرو 5)، مٹھی4، چھور 2 ،میر پور خاص اور ٹنڈو جام میں ایک جبکہ خضدارمیں 11 ملی میٹر بارش ریکارڈ کی گئی۔ہفتہ کو ریکارڈ کئے گئے زیادہ سےزیادہ درجہ حرارت کے اعدادوشمار کے مطابق نوکنڈی ،دالبندین میں درجہ حرارت 46 اور دادو میں43سینٹی گریڈ ریکارڈ کیا گیا۔
